Wad briew ka KHNAM ban pyniakhun MLA na Nongstoin

Shillong, 20 Risaw:
Ka Khun Hynniew trep National Awakening Movement (KHNAM) ka dang wad briew ba biang na bynta ban pyniakhun ia ka elekshon shiteng samoi na nongstoin Konstiwensi bad na bynta ka MDC elekshon.Haba iakren bad u President ka KHNAM u bah Pynsapborthiaw Sai bon, u la ong ba ka party mynta ka la pynkhreh shaid shaid ban wad ia ki briew kiba don ka main rangbah ban shakri ia ki paidbah.
“Ngi dang iawad briew ba biang ban sei kum u kyrtong na bynta ka elekshon ha Nongstoin bad ruh ha ka elekshon shiteng samoi sha ka KHADC”, la ong u President ka KHNAM.
La ong ba lada ka party ka ioh ia u briew ba biang kan pynieng beit ban iakhun hynrei lada kam ioh ia u briew uba biang uba ioh ia ka jingshaniah na ki paidbah kam don jingmut ban pynieng kai namar um lait wat tang ia ka security.
U la ong ba ka party haduh mynta kam pat iashong ban pyrkhat ia kane hynrei ka don ka jingthmu.
Halor ka jingkylli la ka party kan kyrshan ne em ia u kyrtong ka HSPDP na Nongstoin, u bah Saibon u la ong ba kam pat don kano kano ka jingkren halor kane hynrei kumba ka long mynta ka don ka jingthmu ban pynieng beit ia u kyrtong lada ka ioh ia u briew ba biang.
Lah ban kdew ba ka Nongstoin konstiwensi ka la sah thylli hadien ba u MLA jong ka u bah Hopingstone Lyngdoh u la khlad noh dang shen. Katba hynniew tylli ki MDC konstiwensi ki la sah thylli hadien ba ki MDC ki la risain noh na ka kam namar ba ka Iing Dorbar Thawain ka jylla ka la pdiang ia ka ain khang bam ar maloi.