Voice of the People Party/Ka Sur u Paidbah

Bah D. Pakyntein

Lah iohi ba tang ban bam smai, ban long ki MP ruh ym pat dep, lah kynton ia ka ILP, ka Kyrnit ba 8, bad kiwei ki kam ba lah sahteng ha u Prah. Ba lada ka seng kam lah ban pynurlong, u paidbah un kyntait. Ki klet ban kylli shuwa ialade, ki leh aiu baroh shikatta? Hooid donkam bha ia ka ILP. Hap wad ki daw ki nia kiba paka bha khnang ba ka Sorkar Kmie, kan sngap. Long hi ban leit pan skhim khlem da don ki daw, ki nia kiba biang, kiba lah ban pynhun ia ka sorkar kmie? Haba ki khun ki pan pisa na ki kmie ki kpa, kin ym ioh lada kam don ka daw ka nia kaba biang.

Kumba paw ha ki lad pathai khubor ba pan jingkhein shaphang ki skhim, ngin ia ap kaei ka ban jia. Man ka sngi lah iohsngew ba ka long kaba shitom bha ban ioh ia ki skhim pynroi, namar ba ka jylla ka phah da ki MP ki bym don bad ka sorkar, ne u MP ka Shillong, um don bad kiba bun. Ka don ka Directive Principles of State Policy, bad pule shuwa tang ka Artikel 21A, lah biang, kiwei sa pule hadien, namar ba ka Konstitution, ka rben, ka heh palat, haduh ba u Narendra Modi, u hap kyan ban rah ba ka khia, ym dei ito i kot rong saw ba purthuh ia u. Bad ka shitom bha ban sngewthuh, kam lei lei, ka dei ka kam jong ki plidar bad nongbishar ban pule bniah. Ha Ri lum Garo, ka BJP kam don MLA, hynrei ban pynheh ia ka Sports Complex, ka Sorkar Kmie, lyngba ka tnad Ministry of Minority Affairs, ne ka tnad na ka bynta ki rit paid, ka bei pisa da ki spah klur. Bad la khot ia ka, ha ka kyrteng u P.A. Sangma, uwei na ki riewkhraw ka jylla bad ka nam ka jong u, kan sah junom. Namarkata wat pynsngewthuh bakla. Na ka bynta ban pynkiew ia ka jylla, ym dei shuh ban peit seng ha Iingdorbar, la donkam sa ia ka Kti u Saleng, ban iapeh lang ia u Prah.

Shuwa ka elekshon lah iohsngew ba u MP ka VPP, un hap don beit, la ha ka liang synshar ne liang pyrshah, bad kam don kata kaba ha pdeng. Long ki basian badno yn iatehlok, lada ym don, ka bha ba shong marwei: hynrei u don U Blei, namar tang bakla ki lok, lah shah kynnoh lang: Husiar. Hato, tang ba don ha liang pyrshah, hap pyrshah lut ia ki bill, kiba donkam? Lehse, ka lah ban mih ka bill kyntiap seng ha ki District Councils, kaba hap pynbeit ym ban pynkylla ia ka konstitushon, kaba lah pynsgewthuh bakla, hato yn kyrshan ne em? Man ka por ki liang pyrshah, ki ju mlien ban mih na Iingdorbar, khlem ka daw kaba biang. Ha kane ka dorbar mang tyngka ruh kin sa leh kumjuh. U Saleng ruh u ju kren bha ia ki jingshisha, uba stad uba shemphang, hynrei uba pli, namar ba u don ha ka seng Congress, un hap bud lang shabar. Hynrei haba sngap pat ia ki jingkren jong u, lah sngewthuh: um dei u niang-kohnguh. Hato u MP jongngi un mih? Hynrei, u dei ban shong beit marwei ne bad katto-katne ki MP kiba stad, ki bym kyrhuh-lymmuh, bad kin ioh ia ka burom ha Lok Sabha. Haba don tang khyndiat ngut, te u Lamphang un hap ai kren beit, ha kaba yn sngap, ym tang da u, hynrei yn sngap ruh, naduh U Myntri Rangbah bad baroh ki Myntri/MP bad ka lah ruh ban long “Pin-drop-silence” ha Lok Sabha haba lah mih da ki spah shabar, lah iohi ruh ba don, ki bym lehrain shuh ban ialeh drama, ia u Vice-President, ki pyrthuh ba u khih, u iaid kumno. Lah pynlehrain ia ka Ri India, ia kaba ka kyrteng jong ka; ka paw ha ka Baibl ha Ka Kitab ka Esther 1:1. Ha ki por kiba kham mynshuwa, kam da don eh kata ka jing pyrkhing ban leit rung ha Iingdorbar. Tang ka vote ruh ngim don, ba dang rit ka rta, ngi ju leit sha Iingdorbar, tang ban sngap ia u Dr (L) Barrister Pakem, bad tang ieng une u Rangbah bastad/bashemphang ban kren, kynjah jar ka Iingdorbar. Bad ka Telegraph, ka thoh ha ka 18.12.1999, ba kiba bun, ki ju ong ba u dei u myntri uba tbit tam, kaba ka tnad pule-puthi, ka Jylla Meghalaya, ka ioh.

Ko paidbah bashlur-baluilui, balei phi ia khnuim bad ia bitar ba pynjlan ia ka elekshon MDC? Kane baroh ka dei ka jingpyniaid bastad U Blei. Ki Proberb 29:11- Uba bieit u shu pynmih noh ia la ka jingbitar baroh: hynrei u briew uba stad u khang noh ia ka bad u pynjai jai ia ka. Ka dei kaba shisha ba bun ki khun samla ka Ri, kiba 18 snem shapoh; ki mih shakhmat ban ai mynsiem ia ka seng kaba kin sa kyrshan hadien-habud. Ka MDC elekshon kan hap long beit ha kawei ka sngi. Kane ka jing pynjlan ka long pynban ka jingkyrkhu ia ki baroh, da ki hajar ki lah dap bad kin dang dap 18 snem ka rta. Kito kiba 17 snem tam ka rta, ne kito ki ban dang dap 18 snem ha kine ki sngi/taiew/bnai ki ban dang wan, ki lah ban apply lypa, ban pynrung kyrteng, ha ka electoral roll, ym donkam ban ap ia ka sngi kha kaba 18. Wat ju buhteng ong ka ktien tymmen.

Ki jingialap elekshon ha Ri India, mynta ki sngi, ki long kiba i kulmar bha, ka jingiabein-iakhoh ka jur bha, ki kren kat shaba lap ba shem, ki kyrhuh da ka jingdom ia kiwei ki seng, ki kren ia ka bym shisha, ki pynsngewthuh bakla, ki kren kulmar ia ka niam Hindu, ka jingkob-pia, ka jingsarong ka lah kiew sha khlieh, ki jingkular kiba bun, ki paidbah basian, ki tip ba ym lah ban long, bad ki bashida, baluilui, ki pyrkhah ba tang lah ai vote: khatakhat khatakhat khatakhat lah ioh shi lak shi snem. Ngi dom, ngi ia rkhie iapler, ba i komik, ia ki rukom ialap elekshon, hynrei ym bit ban rkhiebein ia kitei baroh. Ngim tip, lehse kine kiei-kiei baroh, ki lah pynbitar ia U Trai. Ka Kitab Ki Salm lynnong kaba 2: 1-ter ter – Balei ba ki jaid bynriew ki ia bitar lep? Dkhot 4 – Uta uba shong ha ki bneng un rkhie: U Trai un rkhiebein ia ki. U Trai u punkut “Suk kita kiba shaniah ha U”.