Nongstoiñ: Ka Seng Khasi Student Union (KSU) Rimuliang Circle ha ryngkat ka jingiadonlang ki nongialam ka KSU West Khasi Hills, ha ka jingiakren sha ki lad pathai khubor myn hynnin ka sngi, ki la kyntait mardor ia ka jingshah kynnoh jong ki pulit Assam halor ka jingthang ia ki lai tylli ki iing jong ki Nepali ha ka thaiñ Langpih bad ki la pynrem ruh ia ka jingkem jong ki pulit Assam ia u dkhot jong ka Seng khlem da tip bad bishar bha.
Ka dur thep vote jong u Pai Simli kaba don ha Assam bad kawei ka Smart Card kaba don ha Meghalaya, ha ka kyrteng kum u Pailostar Syiemlieh
Na ka liang jong u samla Jylliew Marwein President jong ka KSU Rimuliang Circle, haba iakren bad ki nongthoh khubor, u la iathuh ba na ka liang jong ka Seng kala ioh jingtip halor ka jingleh khlieh shrieh jong u wei u briew u bala tip kyrteng kum u Pailostar Syiemlieh u ba la kam ia lade kum u Gaonburrah jong ka Mawlan B bad u la lum thup ruh ia shibun ki dur thep vote bad passport size jong ki paidbah ban pynioh thep vote sha Assam bad ruh ban pynioh skhim na Assam.
Ki kot ki sla bad ki dur jong ki paidbah bala ioh da ka KSU na ka met u Pailostar Syiemlieh
Kumta na ka liang jong ka Seng, ka la leit ban pynlong ia ka jingkhynra ha iing sah jong u tei u Pailostar Syiemlieh bad ki la lap shisha ia kitei ki kot ki sla bad la lap ruh ba u tei u briew u don ar tylli ki kyrteng kata ha Meghalaya la tip kum u Pailostar Syiemlieh, katba ha ki kot ki sla jong ka Assam ka tip kum Pai Simli bad na ka liang jong ka Seng, ki la shim noh ia baroh kitei ki kot ki sla na u.
Shuh shuh u samla Marwein, u la iathuh ruh ba hadien katei ka jingjia u tei u briew u la phet krad noh sha ka jaka jong ki Nepali bad u la ujor ruh sha ki pulit Assam pyrshah ia ki dkhot jong ka Seng bad ha ka shiteng miet jong ka sngi Saitjain jong ka taiew ba la lah, ki pulit Assam ki la wan lai kali sha Iew Nongma bad ki la kem ia u tei u samla Artingwel Kharsanglein u ba dei u dkhot jong ka Seng katba u dang thiah bad u la ong ruh ba u tei u dkhot ka Seng u dei ruh uba don jingduna ha ki dkhot met.
“Wat la u tei u samla u la lait noh na ki pulit ka Assam hadien ba la wan pyllait noh u bah Pangniang, hynrei katei ka jingleh jong ki pulit Assam kala pyntiwng pynsmiej ia ki samla jong katei ka thaiñ kat haduh ba kim bud shuh ban shong bad thiah ha iing bad kila shu hap ban phet rieh noh sha khlaw sha btap” ong u samla Jylliew Marwein.
Ha kaba iadei bad katei ka jingjia na ka liang jong u President ka KSU West Khasi Hills, u samla John Fisher Nongsiang u la ong ba katei ka jingjia ka mih, namar ka jingdon jong ki suri kup snieh langbrot kum u Pailostar Syiemlieh u ba bam ar maloi kata na ka Meghalaya ruh u don ka jingioh nong bad na ka Assam ruh u don ka jingioh nong bad dei ka jingdon kum u tei u briew ba ka sa mih ka jingiapait ia pra ha ka thain Langpih.
Na ka liang jong u samla John Fisher Nongsiang u la kyntu ia ka Election Commission ba kan leh ei ei bad ban pynshitom ia kum utei u riew shim kabu, u ba don kyrteng yhep vote ha ki ar jaka kata ha Assam bad Meghalaya bad u dawa ruh ia ka sorkar Meghalaya bad ia ki bor jong ka ian ba kidei ban kem noh mardor ia u tei u briew u ba wanrah jingklumar khnang ba kum kitei ki jingjia kin nym jia shuh hadien ha bud.