Urlong ka jingangnud ki nongot doh Nongstoin ban ioh iing shohdoh

Nongstoin, 3 Rymphang:
Hadien ka jingiai shah bad ka jingiai ap shitom kaba la slem bha jong ki nongot bad nong die doh jong ka sor Nong stoin, mynta ka kynti kila ioh syndon da ka jaka bad ka iing shoh doh kaba bit ba biang
Ia katei ka jaka shohdoh la tei hapoh ka shnong Porjalem, Maw kawah da ka kong Brisinola Lyngkhoi, kaba dei ka nongshong shnong ka Mawkawah ha ryngkat ka jinglam lynti jong ka hima Nongstoin, ha kaba ki la  lah ban pynurlong ban pynioh ia katei ka jaka shohdoh (butchery) ha kaba kiba bun ki briew kiba ju im ja kpoh na katei ka kam ki la ap khmih lynti la bun bun snem.
Shuh shuh ia katei ka jaka shohdoh la ioh ruh ban plie paidbah mynta ka sngi ha kaba u bah S. Kharlyngdoh DC WKH, u la long u kongsan ban plie ia katei ka iing shohdoh ha ryngkat ka jingia synran lang jong u bah Phylla singh Syiem Syiem ka hima Nongstoin, u bah S.Rashir Sordar Shnong New Nongstoin, bah Overlin Marbaniang secretary Nongstoin Butcher Social and Welfare Association, u bah R.K.Syiem syiem khynnah ka Hima Nongstoin bad ki ophisar jong ka ophis Veterinary, u bah W.Lyngdoh sordar ka shnong mawkawah u ba la pyniaid ruh ia katei ka jingialang.
Na ka liang jong u DC haba ai jingkren ha katei ka sngi u la ai ka jingiaroh shibun ia ki trai jaka bad ia ka Hima hi baroh kawei namar ka jinglong ba la kloi ban iasnoh kti lang na ka bynta katei ka kam namar ki don ruh ia ka mynsiem ka jingkitkhlieh lang na ka bynta ka imlang sah lang kat haduh ba ki la lah ban pynurlong ia katei ka kam.
Shuh shuh u la ong ruh ba ka jingshim khia lang jong ki riew shimet bad kumjuh ka Hima ha ki baroh ki kam ka la long ruh ka record ha baroh kawei ka Jylla wat la na ka liang jong ka sorkar kam shym la lah ban ai jingiarap, hynrei ki la shim hi ia ka jingkitkhlieh na ka bynta ka jingmyntoi jong uba bun balang.
Ha katei ka sngi la ioh ruh ia ka jingkren na u bah Overlin marbaniang Secretary ka Nongstoin Butcher Social And Welfare Association, ha kaba u la pynpaw ka jingsngew kmen bad ka jingsngew nguh shibun ia ka hima namar ba ka la shimkhia lang ia ka jingeh jong ki kam ka jong ki kum ki nongotdoh, u la ong ba naduh ha ki por ba la leit ki nongot doh kila mad ia shibun ki jingeh ha kaba la shah thnum ruh namar ka jing bymdon jaka otdoh kaba thikna.