Jowai, 5 Nohprah:
Hadien ba ka Executive Committee jong ka JHADC ka la shim ia ka rai ban weng noh ia u Rangbah Shnong ka Ummulong, u ma Shelsing Langi ha kaba la tung Rangbah Shnong Shipor ia u ma Leo Laloo, na ka liang u ma Shelsing Langi u la kiew sha iing Bishar ka Meghalaya High Court.
Na ka liang ka Iing Bishar badonburom mynta ka sngi ka la shim ia ka rai ban hukum ia u tei u Rangbah shnong ka Ummulong ban lum noh ia ka Dorbar Shnong hapoh shi taiew lane ha ka 12 tarik une u bnai.
Kane ka hukum ka la mih na ka daw ba la lap ba ka daw ba ka JHADC ka la weng ia u ka long namar ba um shym la khot dorbar satia bad ka Iing Bishar ka la kyntu ruh ia ka JHADC ban weng noh ia ka hukum weng rangbah shnong ia u ma Shelsing Langi ba un khot ia ka dorbar shnong.
Ha kajuh ka por ka iing bishar ha ka hukum ba la pynmih da u Chief Justice, ka la bthah ia ka District Council ban bthah ia u Dolloi ka Elaka ba un long u nongpeit ngor ha katei ka Dorbar Shnong bad ba un phah ia ka report sha ka EC jong ka JHADC khnang ba JHADC kan shim action halor ka Report jong u Dolloi.
Na ka daw ba ka don ka jingsuba ba ka lah ban mih ka huri hura, ka Iing bishar ka la dei ban kyrpad ruh ia ka bor District ban pynbiang ia ki bor pahara ha ka por ba pynlong ia ka dorbar shnong.