Ujor u symbud lamphang ka KHADC, ba khlad ka longkmie

Shillong, 21 Naitung:
U Symbud Lam phang ka Khasi Hills Autonomous District Coun cil (KHADC) u Bah Pyn iaid Sing Syiem u la ujor sha u myntri ka tnad ka koit ka khiah ka jylla u Bah AL Hek halor ka jingkyn noh ba la leh torti ki nongtrei ka Shillong Civil Hospital ban ai jingsumar ia ka longkmie haduh ba ka khlad noh.
U Symbud Lam phang ha ka jingujor ha u Bah Hek, ba la phah ruh sha u Director ka Health Services, ha kane ka sngi Nyngkong u la kyntu ia ki bor ba dei peit ka sorkar ban pynshitom ia kito kiba leh torti ia ka kam ban duh ei ka mynsiem ba kordor.
“Nga kyntu ia ka sorkar ba kan leh mardor ia kane ka kam ban pynshitom ia kito ki briew kiba leh torti ha kane ka jaka sumar”, la ong u Bah Syiem ha ka shithi ba la phah.
U Symbud Lamphang u la ong ba kum kane ka jingjia, ka la mih bunsien ha kaba ki briew na jaka nongkyndong ki ju iakynduh jingeh namar ka jingshah leh bym salia ha ki briew jong ka hospital.
Ka jingujor ka long hadien ba kawei ka longkmie kaba kyrteng ka Bantilis Nongrum kaba khlad noh ha kane ka sngi Nyngkong namar ka jingkynnoh ba ki bor ba dei peit ka jaka sumar ki khlem kitkhia khamtam ki doktor ha kane ka jaka sumar sorkar.
U Bah Syiem u la ong ba ka Kong Nongrum ka khun jong ka Kong Mistora Nongrum na Riangmang, Mairang ka la wanrah sha Shillong Civil hospital hadien ba ka la ud pang shit ha ka 19 tarik Naitung.
Ka la ioh ia ka jingsumar na ki doktor tang ha emergency room haba la wanrah ha hospital hynrei hadien ba la rah sha jaka tiah, ym don doktor shuh ba wan sumar ia ka.
“Ha ka jingshisha, bunsien ka hymen jongka ka la pyntip ba ka para ka la pang jur hynrei ki nurse kim patiaw eiei bad ki la beh pynban ia ka shabar da kaba ong ba ki doktor ki dang bunkam ha Emergency Room,”, la ong u Bah Syiem.
Ka kong Bantilis Nongrum ha ka sngi kaba bud ka la khlad noh ha ka por kumba 5:30 p.m.
Katkum ka jingong u Symbud Lamphang ka KHADC, ka Kong Nongrum ka la khlad noh namar ka jingleh torti ki bor katei ka jaka sumar bad u la dawa ba dei ban pynshitom ia ki nongtrei kiba bym kitkhia ia ka kam.