Nongpoh: U Bah Kronding Nongbsap na ka shnong Syllei-U-Lar ha Ri Bhoi District, u la ujor da kaba phah jingthoh sha ka Deputy Commissioner Ri Bhoi, kata hadien ba u la lap ba ka jingkieng Dwarksuid kaba don ha surokbah Shillong Bye-pass ha Ri Bhoi, ka la sdang bad synjor namar ka jingdon ki dak ki shin ba katei ka jingkieng ka la sdnag ban orpait bad kaba buh jingma ia ki nongleit nongwan lyngba katei ka jingkieng.
Haba kren sha ki Nongthoh Khubor, u Bah Kronding Nongbsap, u la ong ba ka nongrim kaba la pynlong ia u ban ujor noh sha ka Deputy Commissioner halor ka jingsynjor katei ka jingkieng, ka dei hadien ba nalade u la leit ban jurip ia katei ka jingkieng bad lap ba katei ka jingkieng ka la synjor bad kaba la donkam eh ia ki bor sorkar ba kin shimkhia, khnang ban lait na kino kino ki jingjia ba sngewsih.
Ha ka shithi ujor, kaba u la phah sha ka ka Deputy commissioner, utei u rangbah u la kyntu ia ka DC ba ka dei ban shimkhia halor katei ka bynta, na ka bynta ban phah jurip da ki riewshemphang bad kiba la tbit ha ka kam shna jingshna (Construction), namar ym lah ban tip la katei ka Jingkieng ka dang skhem ne ka la synjor bad dei tang kito kiba la shemphang ha ka kam ki lah ban pynshai sha ki paidbah la ki paidbah ki dang lah ne em ban pyndonkam ia katei ka jingkieng.
Utei u rangbah u la kyntu ia ka tnat PWD bad ka bor Disrtict, ba ki dei ban shimkhia halor kane ka bynta bad kaei ka jingsngew jong u kum u nongshong shnong, khnang ba kan long ka jingshngain ia ki paidbah nongleit nongwan bad kiba pyndonkam ia katei ka jingkieng.
Phi don ban ong eiei?