Ujor u nongkhaii sha kashari, pyrshah ia u OC Borsora

Shillong, 15 Nailur:
U nongkhaii na South West Khasi hills district u Hari Sarkar u la ujor sha ka Kashari u ADM Court ha Mawkyrwat, pyrshah ia u officer in-charge (OC) ka Borsora police outpost halor ka jingkynnoh ba u leh ia ki kam runar bad ki kam shah shiliang.
“Ka dorkhas pyrshah ia ki kam runar bad ki kam shah shiliang jong u Sub-Inspector (SI) u Bablu R Marak la ujor ha ka district court jong u ADM ha u Nailar ba la dep da kaba dawa ba dei ban pynshitom ia u OC katkum ka ain” la ong u nongiasaid ain u PK Bora ha ki lad pathai khubor ha kane ka sngi Saitjain.
U Hari Sarkar uba kam ba u la don ha ka kam khaii ha iew Borsora la 18 snem, u la kynnoh ba utei u SI u la pyndik ia ka jingim jong u, tang namar ka jingshah pyniaid khliehshrieh ha uwei u nongkhaii na Delhi u Dilbag Nashier.
“Ha ka 4 tarik Nailar, u Marak bad u Nashier lem bad kiwei ki la wan sha dukan workshop bad ki la pynbor ia nga ban soi ia ka jingiateh ha ka kam khaii kaba T. 9 lak,” la kynnoh u Sarkar.
U Bora uba iasaid ia u Sarkar, u la iathuh ba katkum kane ka jingiateh, u Sarkar u shah pynbor ban siew haduh T. 9 lak ha u Nashier. U la kynnoh ba u Nashier u la pynbam pisa ia utei u OC ban hukum ia u Sarkar ban soi.
Katkum ka jingong u Sarkar, shwa ia kane, u Nashier u la phun ia u ban iatreilang ha ka kam khaii ban jer kum ka M/S Mary Enterprise ha Borsora. “Hynrei kane ka jingthmu ban iatreilang kam long”, la ong u Sarkar.
U Bora u la iathuh ba ha ka 11 tarik Nailur, ia ka jingkren jong u Sarkar la shim da ka Kashari. U la iathuh ruh ba hadien ba utei u pulit u tip ba la ujor mukotduma pyrshah ia u, u la kem ia u Sarkar bad u la set ha phatok bad byrngem ruh ban leh ei ei kaba ma lada um weng noh ia ka mukotduma.
U Bora u la kynnoh ruh ba ka rekod kaba nyngkong ka la jah na kashari, bad bynrap ba , “U ADM MS Sangma u la pynthikna ba ia kane ka mokotduma yn shna biang bad ong ban ujor da kaba thymmai halor kane ka kam” bad bynrap ba ka District court ka la buh ha ka 24 tarik ban pynlong ia ka jingbishar”.
U Sarkar u dei na Siliguri jong ka West Bengal u la wan sah sha Shillong bad ka lok ki khun ki kti. U la kynnoh ba u officer in charge ka Borsora outpost u la donkti ha ki kam lum pisa beain na ki nongkhaii ha katei ka thaain. “Ngi hap ban siew pisa sha utei u pulit man ka por” la kynnoh u Sarkar.