![](https://www.urupang.com/wp-content/uploads/2024/02/DSC00678-18.jpg)
Shillong:U MLA ka North Shillong u bah Adelbert Nongrum ula ujor hapoh ka ing dorbar ia ka jingkiew dor ka bai skul, nalor ki jingsiew ba bun jait kiba la buh ki bor skul, kaba la ktah ia ki kmie ki kpa kiba duna ka ioh ka kot, kaba pynrem ia ka mynsiem ka Right To Education (RTE).
U la ong ba ka tnad pule puthi ka la pynmih ia ka jingpynbna ia ka por long skul bad ki sngi long skul bad plie skul dang shen, hynrei kane ka jingleh ka long kumba leh shiliang namar ia kawei ka bynta kaba iadei bad ka jingsiew ia ka bai rung skul, nalor ki jingoh dor ia ki kam bapher bapher.
Haba iaroh ia kane ka sienjam ka sorkar, u bah Adelbert, ula thalain pat, ba ka sorkar ka la leh matlah ia ka jingeh jong ki kmie ki kpa ban tehlakam ia ka jingheh palat ka bai skul, ki dor jong ki kot pule. U la ong ba kane ka jingheh ka bai skul ka la ktah jur ia ki kmie ki kpa bad bun ki skul shimet kila shim ka dor kaba heh watla ki la ioh jingiarap na ka sorkar. Ula kynnoh ba ka tnad pule puthi ka la khaprip khmat halor kane bad ka la pynrem ia ka mynsiem ka RTE Act.
Ula dawa ba ka sorkar ka dei ban treikam mardor ban tehlakam ia kane ka shim kabu ki jaka pule bad u la ai jingmut ba ki dei ban iasyllok ia ki kmie ki kpa shwa ym ban shu shim dor kaba heh.
Halor kane, u myntri ka tnad pule puthi ka jylla u Rakkam A Sangma u la pyntip ba ka sorkar ka la pynmih ia ka jingpynbna halor ka por plie skul, bad ka jingkhang ia ki skul, ka long ban wanrah ia ka jinglong ryntih ia ki skul, namar ba don ki skul kiba shu khang bad plie katba mon kaba long pyrshah ia ka Right to Education (RTE) Act.
Haba pyntip mynta hapoh ka iing dorkar, u Rakkam u la ong ba ka sorkar ka la kwah ban pyntreikam ia ka RTE khnang ba kan ym don ka jingpynkhia ia ki khynnah.
Ha kajuh ka por, u la ong ba ka jingheh ka jingsiew ha ki skul, kane ka dei ka mat kaba ktah bha ha kaa la don ki kmie ki kpa kiba la wan iakynduh ia u halor kane. Halor kane, ka sorkar ka la thaw ia ka State Education Commission ba kan bishar bad ai jingmut sha ka sorkar halor kane ka bynta nalor kiwei pat.
U la ong ba ka sorkar kan eksamin lyngba ka Committee ban sa thaw, halor kane ka jingujor u MLA khamtam ha kaba iade bad ka jingsiew ha ki skul khamtam ha ki skul sorkar bad kiba ioh jingiarap na ka sorkar.
Phi don ban ong eiei?