Ujor U MLA, ba pynthut ka Assam ia ka surok na Athiabari sha Umshiak

Nongstoiñ: Ka jingwan pynthut kaba khari khari jong ka sorkar Assam ia ka jingpyntrei ia ka surok ha khappud kaba hap hapoh khappud Meghalaya bad Assam kala pynlong ia u MLA ka Nongstoiñ Constituency u bah Macmilan Byrsat ba un phah tuklar syndon ha u Myntri Rangbah ka Jylla u Conrad K Sangma ba un shimkhia.
Na ka liang jong u MLA ka Nongstoiñ, dang ha kine ki sngi ba la dep u la phah ia ka jingthoh sha u Myntri Rangbah ka sorkar jylla ba un tuklar halor katei ka jingpynsangeh ia katei ka jingwan pynthut kaba man kapor jong ka Assam ha kaba iadei bad ka jingpyntrei ia ki kam pynroi ha ki thaiñ khappud.
Katei ka jingwan pynthut jong ka Assam ka dei ia kawei ka jingtrei ia ka surok Athiabari haduh Umshiak kaba jngai haduh 6.002KM ia kaba la pyntrei ruh lyngba ka skhim PMGSY.
Katkum ka jingiathuh u MLA ka Nongstoiñ, la ong ba ia katei ka surok la ioh ban pyntrei naduh u bnai Risaw jong u snem 2018, hynrei ki katto katne ngut ki briew na Assam ki la wan ban pynsangeh jubor ia katei ka jingpyntrei bad ki la byrngem ruh ia ki nongtrei kiba pyntrei ia katei ka surok bad katei ka jingpyntrei ia katei ka la pynsangeh noh shuwa bad hadien ba la tuklar da ka bor District na West Khasi Hills la sdang biang ban pyntrei.
Shuh shuh u bah Macmillan Byrsat, MLA u la iathuh ruh ba u la ioh ruh ban shong bun tylli ki jingialang hapdeng ki heh sorkar jong ka sorkar Assam bad Meghalaya, ha kaba kawei na ki rai jong katei ka jingialang hapdeng ar liang mamla ka dei halor ka jingpyntreikam bad ban ia burom mar kylliang lyngba ka Status-quo hapdeng kitei ki ar tylli ki jylla ha kaba ka jingpyntrei ia kino kino ki kam pynroi kadei ban iaid shaphrang hapoh ki thain khappud.
Hynrei u la ong pat ba kaba sngewkyndit ka long ba ha u bnai Iaiong, 2019 ki ophisar ryngkat ki pulit ka sorkar Assam ki la wan sha katei ka jaka ba pyntrei ia katei ka surok PMGSY ha Athiabari haduh Umshiak bad ban pyngsangeh ia katei ka jingpyntrei iaka surok bad ki la byrngem ruh iaki nongtrei kiba pyntrei ia katei ka surok, bad katei ka jingpyntrei ia katei ka surok ka la sangeh noh haduh mynta.