Ujor u Bah Witting ba don ar tylli, ki jingkieng thew ha kajuh ka surok

Shillong, 09 Lber:
U MLA ka Mawthengkut u Bah Witting Mawsor u la pyrshah jur ia ka jingbuh ka sorkar, ia ar tylli ki jaka jingkieng thew (weighbridge) ha Mawpun ha kajuh surok Shallang-Athiabari ha West Khasi Hills bad kata ruh tang hapdeng ka jingjngai kaba 12 km.
Haba buh ia ka jingkylli ia kane, u Bah Mawsor hapoh ka iing dorbar mynta ka sngi, ula ong ba kane ka jingleh ka sorkar, ym lah ban pdiang namar ba hajuh ka surok kan don ar tylli ki jaka thew bad u la dawa ba dei ban rah noh shawei pat sha khappud ka Meghalaya bad ka Assam.
“Lada ka sorkar kam kynriah noh ia ka jingkieng thew na Mawpun, ngan ujor sha ka High Court”, la maham u Bah Mawsor.
Haba jubab halor kane, na ka liang u myntri ka tnad ka kit ka bah u Bah HDR Lyngdoh u la kyntait ha kaba nyngkong ban pdiang ia ka jingdawa u MLA ka Mawshynrut da kaba ong ba ia kane ka jingkieng thew la ioh bor na ka National Green Tribunal (NGT) hynrei kham hadien u la ong ba sorkar kan bishar biang ia kane ka jingkyrpad u Bah Mawsor.
U Bah HDR Lyngdoh u la iathuh ba ka sorkar ka la ai wai shi snem ia katei ka jingkieng thew ha ka dor T. 90 lak ha u riew shimet bad ka dor ban khrong na kawei ka trok kit dewiong ka long T. 200.