Ujor sha u myntri, ba shah weng kyrteng uba kwah niah kali

Shillong: Ka Synjuk ki Seng Samla Shnong (SSSS) Upper Shillong ki lah leit ban ia kynduh ia u myntri ba dei khmih ia ka tnad pynroi sor u bah Hamlet Dohling ban pynpaw ia ka jing khia mynsiem halor ka jing shah weng  kyrteng kyndit u Donboklang Thabah na ka thup ki nong shah jied ban leit pyntbit ialade ban niah kali ha ophis DTO, Shillong.

 Kum ba shu pynpaw u Donboklang Thabah u dei u ba shong ba sah ha Nongumlong Upper Shillong bad u ba dei ruh na kiwei ki nong thep kam kum u draibar ha ka Planning Department. Ryngkat lang bad kiwei ka kyrteng jong u ruh ka lah mih ha ka thup ki ba ba shah jied ban wan ban leit pyntbit ialade ha ka rukom niah kali ha ka ophis DTO, Shillong.
 U Secretary ka SSSS u Wonderson Dkhar u lah iathuh ba ha ka 19 tarik Naiwieng lah don ba phone ia u Donboklang Thabah na ka tnad Planning Department ba u lah shah jied ban leit pyntbit ialade ha ka kam niah ha ka kali ophis DTO, Shillong ka ban long 19 tarik Nohprah, hynrei ha ka 26 tarik naiwieng u lah ioh phone biang ba ka kyrteng jong u ka khlem paw re ha ka thup ba shah jied. Haba u lah leit kylli na ka ophis  Planning Department u lah ioh jubab ba ka jing mih kyrteng jong u nyngkong ka dei ka jing bakla
 Na ka liang ka seng ki pynrem jur ia ka jing leh torti ka tnad Planning Department ba ki dawa na u myntri Hamlet Dohling ban leh ei ei halor kane.