Shillong:U bah Banshai Marbaniang u ba dei u ba trei mon sngewbha mynta ka sngi u la thoh shithi sha u myntri rangbah ka jylla u Conrad K Sangma ban pynpaw halor ka jingeh ki nonghikai kiba khlem ioh tulop hadien bala khanglut ki skul namar ka jing pang ‘corona virus’.
U bah Banshai Marbaniang u la ong ba bun ki nonghikai skul shimet bad ki skul niam kum ha kane ka por ki ia kynduh bun ki jingeh khamtam haba dei bad ka jing duh tulop namar ba ki skul ki la khanglut namar ba don ka jing pakhang shnong lane ka ‘Lockdown’ ha baroh ka ri India. U la pynpaw ruh ba hadien ba ka sorkar India ka pynmih ia ka hukum ba ym dei ban phah siew bai skul iaki khynnah haka por ba don ka ‘lockdown’, bun ki nonghikai naki skul shimet kila duh iaka tulop jong ki.
Haba dei bad kane u Bah Banshai Marbaniang u la pynpaw ba bun ki skul ki shem jing jynjar ban pynbiang iaka tulop ki nonghikai namar ka jing bym siew bai skul ki kmie ki kpa ki khynnah skul. U bah Banshai Marbaniang u la kyntu ia ka sorkar lyngba u myntri rangbah ka jylla ban phai khmat lang sha ki skul shimet ha badei bad ka jing pynbiang tulop iaki nonghikai kum ha kane ka por.
Nalor kane u bah Banshai Marbaniang u la ai ka jing iaroh sha ka sorkar Meghalaya kaba la lah ban leh katba lah ban pynbiang ka jing iada iaki paidbah naka jing pang ‘corona virus’ bad haba kala lah ruh ban mang tyngka sha ki MLA bad MDC naka bynta ban ai jing iarap sha ki paidbah kum ha kane ka por.
Nga sngew iahap ia Kane ka jingthoh. Namar Kam long kaba suk ia ki nonghikai skul shimet ba kin ymioh ia ka tulop.Bun naki kiba shu im ja nangne,haba Kum Kane ka por shaei kin phai. Nga kyrpad ia ka sorkar ba sngewbha bakan shim khia halor Kane ka phang.