Ujor sha U CS, ba bteng ki jingtei beain harud Wah Myntdu

Shillong, 1 Jymmang:
U Bah Sajay Laloo, ula thoh mynta ka sngi sha U Chief Secretery ka sorkar Meghalaya, ha kaba ula ujor halor ka jing bym pyntreikam jong ka sorkar Jylla, ia ka hukum jong ka National GreenTribunal, kaba ka la pynmih, ha ka 10tarik Iaiong 2017.
U Bah Laloo, u ong ba ka sorkar, ka shaniah ban pynkhuid ia ka wah Myntdu, tang ha ka Jowai Municipal Board, kaba dei ruh ka tnat kaba ialade ruh ka don ka jingpang kaba jur bha, namar tang ka tulop ki nongtrei lajong ruh kam lah satia ban siew. La ong ba haduh mynta ka JMB, kam don satia wat tang ka jaka bret niut ha ka sor bah Jowai, lait noh, tang I jaka bret niut iba shi dana eh.
La ong shuh shuh, utei u rangbah, ba ka tnat pynroi sor, kam shym la pynsangeh satia ia kito ki jingtei iing, kiba don ha ki rud um jong ka wah Myntdu bad ka tnat khlaw ruh, ka dei ban khang ia ki kam pynjaboh, kiba don ha katei ka Wah. La ong shuh shuh ba ki nala, kiba na ka nongbah Jowai, ki tuid lut ia ki jaboh jabain sha Wah Myntdu bad nangta sa ki bitor kyiad ruh ki tuid lut sha katei ka wah. U Bah Laloo, u khmih lynti ba ka sorkar Jylla, kan pyntrei kam hok ia ka hukum jong ka NGT bad ba ka sorkar kan bthah ba ka tnat PWD, kan shna ia ki nala kiba biang bad kiba pyntuid jaboh bad kumjuh ba ka tnat PHE, kan ai ia ki painkhana duna dor, ban nym don ka jingleit shabar sha ki rud nong jong katei ka nongbah.