Ujor sha u CIC bym ai jingtip ka KHADC, halor ka Hima Mylliem

Shillong, 22Nailur:
U bah Disparsing Rani u la ujor sha u CIC ka Meghalaya Information Commission halor ka jingbym lah ka Khasi Hills Autonomous District Council ( KHADC) ia ka jingtip kaba u la pan naduh ka 22 tarik u naitung 2015 halor ki kam ba ia dei bad ka Hima Mylliem. U la ujor ba la pan jingtip ia ki 5 tylli ki mat hynrei ka KHADC ka lah ban ai jingtip tang 2 tylli , u la thoh sha u CIC ba un pynshtom katkum ka aiñ jong ka RTI Act namarba kam shym la lah ban ai jingtip ha ka por kaba biang.
Katkum ka jingtip ba u bah Disparsing Rani u la pan lyngba ka RTI u la kwah kopi ia ka jing iasoi soskular hapdeng u CEM barim ka KHADC u bah Ardent M Basaiaw moit bad u Syiem ka hima Mylliem u Pa’iem Latho Manik syiem ha ryngkat ka jingiasoi ki 2 ngut ki myntri ka hima Mylliem u myntri K.Langstieh bad u myntri M.B Kharlukhi ha kaba ka KHADC ka la lah ban ai kopi sha u ia katei ka jingiasoi ha ka 22 tarik u jymmang, 2014. Kawei pat ka jingtip kaba u la ioh ka long halor ka jingkwah kopi jong u ia ka Mylliem Syiemship Act 1958 kaba la batai ba 23 tylli ki kur ba kynthup ia ka kur Kharbuki ba kam lah ban shong hapoh ophis ka hima hynrei ki lah ban wan sah ka Dorbar pyllun tang lada don ka jingjied Syiem lane lada ioh bor na u Syiem. Kiwei pat ki jingtip kiba um shym la ioh ki long la ia ka jingiasoi ban pynlong Law Adong ia ka Lum Mawpat ka dei kaba u CEM ka KHADC u la phah da ka jingthoh ban khot ia u Syiem na ka bynta ban wan ia soi? bad lada ka don u la pan kopi ia katei ka jingkhot u CEM ia u Syiem khnang ba yn lah ngeit ba ia katei ka jingiasoi la ia soi ha ophis ka KHADC.
Nalor kiwei pat ki jingkwah jingtip ba u la thoh lyngba ka jingwad jingtip lyngba ka RTI , u bah Disparsing u la ong ba katkum ki kyndon Aiñ jong ka hima Mylliem u Syiem bad ki kynhun myntri jong u u lah ban soi ia kano kano ka soskular ha kaba ia dei bad ka khyndew ka shyiap donkam ia ka jingmynjur ka Executive Dorbar, hynrei u la kynnoh ba ha katei ka jingiasoi u Syiem bad ki 2 ngut ki myntri kam shym la don ka jingynjur na ka Executive Dorbar. Utei u nongwad jingtip lyngba ka RTI u la kynnoh ba baroh ka hima Mylliem bad ka KHADC ki la pynkhein ia ki kyndon Aiñ .
Shuh shuh u la ong ba katkum ka Aiñ kaba la mynjur da u Lat ka Assam ha ka 23 tarik u rymphang, 1958 ka kdew shai ba ki 23 tylli ki kur kim lah ban long ki dkhot jong ka Executive Dorbar lane ban shong ophis hapoh Hima Mylliem, lane kim lah ban soi ia kano kano k a jingthoh kaba dei ka bynta jong ka hima Mylliem bad ki don bynta tang ka jingjied Syiem naba ki dei ki Elector hynrei mynta u la ong ba ki don 5 tylli ki kur kiba hap hapoh ka 23 kur kiba shong ophis bad ki dei ki dkhot ka Executive Dorbar ka hima Mylliem. Kitei ki 5 tylli ki kur u la ong ba ki dei ka kur Kharbuki, Kharbudnah, Pathaw Lario, Rapsang bad Sohsla , u la kynnoh ba mynta kitei ki shong ophis ha hima Mylliem bad ki dei ki dkhot jong ka Executive Dorbar.