Ujor sha U Amit Shah, ba thombor ia ki bym dei Kristan ha Meghalaya

Shillong: Ka East Student Union ka la phah shithi sha u Union Home Ministry ka ri India u Amit Shah kaba phah ka jingujor pyrshah ia ki Student Union bapher bapher kiba don ha kane ka ri lum Khasi, ia ki iingmane Khistan bad ki nongialam jong ka, ba ka ju don ka jingthombor kaba man ki por pyrshah ia kiwei pat ki jaitbynriew ne wat la ki jong ki jait ki bym dei ki Khristan kiba im ba sah hapoh kane ka jylla.

Kumba ngi tip ba ka Meghalaya ka dei ka jylla kaba la tap byllen da u riewngeit Khristan, hynrei kaba lyngngoh pat ka long ba ka jur bha ka jingsngew iapher jait iapher kynja bad ka jingiapher niam kaba la lam sha ka jingsyier ka shong suk shong sain ia jaitbynriew rit paid kiba shong ha ki shnong ki kyntoit kane ka jylla. Ha kane ka shithi ka East Student Union ka la pynpaw ia ki katto katne ki jingjia na ka daw ka jingsngewiapher niam iapher kynja.

Ha ka snem 2001 ka la don ka jingpyrshah na ki katto katne ki nongialam ka niam Khristan kaba ha ka kyrteng jong ka Dorbar shnong, ka pyrshah ban thang ia ka met jong u Lt. Pharsaited Buhphang namar ba u dei na ka niam tynrai. Ha ka snem 2002 u nongtrei ba ha khmat jong ka seng Social Worker uba dei ruh u nongialam ka seng Khasi u Bah Rijoy Sing Kongshah u la shah rahbor, namar ba u la leit bud ia ka niam tynrai. Katto katne ki kynhun ki la pynpra ia ka jaka leh niam ha u Lum Sohpetbneng, ka jaka kaba ki riewngeit ka niam tynrai ki shait pynlong ka jingiaid pilgrim. La don katto katne ki kynhun kiba la khang pyrshah ia ki riewngeit Hindu ban leh niam ha u Mawjymbuin kaba don ha Mawsynram. Ka la don ruh ka jingia ieng ialeh pyrshah ha kaba ka kynhun ki riewngeit Khristan ka la khang pyrshah ia ka kynhun ki riewngeit ka niam tynrai ban thang ia ka met u nongialam ka seng Khasi, ha ka jaka thang kaba don ha Mylliem. Ka shnong Kongthong kaba don kumba 80% ki riewngeit ka niam tynrai, myn ha ka snem ba la dep ki la mad ka jingshah thombor na ka kynhun ba la ialam khmat da ki nongialam ka niam Khristan ha kaba ki la pynpra ia ka jaka leh niam jong ki. Dang shen ka Jaintia Students Union ka la shah pynthame na ki nongialam ka niam Khristan ban pyrshah ia ka jingbuh ia u blei Ganesha ha NIT Campus Shillong kaba la buh ia ka mynsiem khohnioh ha ka imlang sahlang.
Kane ka shithi ka ong shuh shuh ba tang namar ba ka Meghalaya ka dei ka jylla Khristan, ka sorkar bad ki pulit kim ju shim khia ia kum kine ki case bad um ju don ki bor kiba paka ban khmih ia ki Office sorkar ki skul bad ki college bad wat ha ki jaka paidbah. Lada ka jingthang ia ka met, ka jingbuh ia u blei Ganesha, ka jingbud ia ka niam tynrai ka long ka kam beain lane ka long pyrshah ia ka jinglaitluid ha ka rukom mane blei te balei ba ki Missionaries Khristan ki lah ban khring sha ka jingngeit jong ki haduh mynta, balei ba ki skul bad ki College Khristan ki buh ia u statue u Jisu bad ialap ia ka niam Khristan ha ki jaka pule, balei ba ki Office sorkar ki buh ia ka dur u Jisu ha ki kamra jong ki, balei ba ka North Eastern Hills University kaba pdiang ia baroh ha la ki jong ki jingngeit, pynban ki dang don ki kam ialap hapoh ka campus ba la ialam da ki nongialam ka niam Khristan ban Khring sha ka jingngeit jong ki, balei ba bun ki kali sorkar ki buh ia u statue bad ka dur u Jisu, balei ba ha man la ki dong bad ki jaka paidbah ha Shillong la pynieng ia u statue u Jisu Khrist.
Ha kane ka shithi ba la thoh da ka kyrteng U bah HG Nongrum President bad U AC Sangma, Secretary, ka East Student Union ka pynpaw ka jingbynniaw kaba khraw lada kano kano ka seng khraw paid ka lah ban thombor ia ki rit paid, te ka jingsynshar paidbah ha ri India kaba la ju pynshong nongrim baroh shi katta ha ka jinglaitluid ha ka rukom synshar bad ha ka mane blei ka la pynbakla noh haba ngi khmih ia kine ki jingjia kiba la jia ha kane ka jylla, te ngi kum ka Union ngi dawa ba ki bor ba halor kin shim da ki lad ban pynshitom tyngeh ia kine ki Student Union, ki iingmane bad ia ki nongialam ka niam Khristan khnang ba ngin lah ban pynneh ia ka shong suk shong sain ha ka imlang sahlang.