Ujor sha KHADC, ba thung myntri Nongkhlaw

Shillong, 25 Rymphang:
Ki Rangbah na ka kur Nongkhlaw ki la ujor sha ka KHADC lyngba u EM ba peit ia ka Elaka u bah Lamphrang Blah ha kaba ki la kynnoh ba u Syiem ka Hima Mylliem u la leh thur mur ha ka kam thung myntri na ka kur Nongkhlaw. Ia katei ka jingleh thur mur ki la ong ba la lap lyngba ka jubab RTI kaba ki la ioh ha ka 23 tarik u rymphang 2016.
Kitei ki Rangbah ba kynthup ia u bah Traiket Nongkhlaw (Mylliem-Mawiong Unit), u bah Kitbor Nongkhlaw (Lumparing Unit), u bah Klursing Nongkhlaw (Mylliem-12 mer Unit) bad u bah Damining Nongkhlaw (Mylliem-Mawkhar Unit), ki la pynkynmaw ruh sha ka KHADC ba u Syiem ka Hima Mylliem u la pyn kheiñ ia ki kyndon aiñ da kaba um shym la ai jubab ia ka shithi jong ka KHADC kaba la phah ha ka 12 tarik u kyllalyngkot 2016 kaba la buh por hapoh 15 sngi hynrei mynta la jan shibnai shiteng ruh kam shym don kano kano ka jubab.
Kitei ki Rangbah ki Rangbah ki la kynnoh ba ka don eiei sha lyndet halor ka kam thung myntri Nongkhlaw hapoh ka hima Mylliem. Ha ka jingthoh sha ka KHADC ki la kyrpad ba kan shimkhia noh ban pynbeit ia katei ka kam khnang ba kan ym mih ka kynrum kynram bad ka jingbym ia sngewthuh jingmut ha ka kur Nongkhlaw.