“Ujor sha ka Commission lada shah leh bein ki khynnah”

Shillong, 9 Jylliew:
Ka Chairperson ka State Commission for Protection of Child Rights Kong Meena Kharkongor, ka la kyntu ia ki paidbah ba kin wan shakhmat lada ki lap ne iakynduh ia ka jingshah lehbein ne shah ban bein ki khynnah.
Ka chairperson ka Commission ka la khot ruh ia ki nongshong shnong ka jylla ba kin ai ia ka jing iatreilang ha kaban pynthi kna ia ki jingiada ia ki Khynnah na ka jingshah thombor bad ka jingshah iuhroit ka hok jong ki.
Ka ophis treikam jong ka Commission ka don ha Nongshilliang, Nongthymmai mar pyrshah ka skul H.Elieas Memorial High School bad ong ba lada don kano kano ka kam ne ki jingmudui halor ki kam thombor ia ki Khynnah, ki lah ban wan ai ka jingmudui beit beit sha ka Commission.
Ka Chairperson kala iathuh ba ka Sorkar Jylla ka dang pynmih ia ka hukum thung Chairperson dang ha u bnai Rymphang 2014 bad namar ka jingbun ki jngit ki jngat ha ka rukom treikam ka Sorkar bad kumjuh ruh ka jingbym pat ioh ia ka mang tyngka, ym shym la lah satia ban ioh ia ka ophis treikam kaba biang bad dei tang ha ki kut taiew u bnai Jymmang ba ila ioh ia ka Ophis treikam hapoh Nongshilliang. Ka la pynpaw pat ia ka jingeh ha ka jingtreikam namar kat haduh mynta, ka Sorkar ka dang pynkhreh ban thung ia ki Dkhot ka Commission bad kumjuh ruh kam pat ai jingmynjur na ka bynta ban thung ia ki Nongtrei hapoh ka Ophis.
Mar syn ioh ia ki Dkhot bad ki Nongtrei, ka Commission kan trei khlem shongthait ha baroh ki kam ba ktah ia ka hok jong ki Khynnah, ka la ong.