Shillong: U SP Mahanta, u riew said jong ka Jylla, ula ujor sha ka Meghalaya High Court, ha ka 4tarik Jymmang 2020, halor ka rai jong ka sorkar Jylla, na ka bynta ban buhteng ia ka jingsiew ia shi bynta jong ka tulop jong ki nongtrei sorkar.
U Mahanta, haba leit rah ia katei ka jing mudui, u iathuh ba dang shen ka sorkar Kerala, ka la rai ban leh ha katei hi ka rukom, hynrei ka Kerala High Court, kam shym la pdiang satia ia ka rai jong ka sorkar ha Kerala.
La iathuh ba U Advocate General jong ka sorkar Jylla, ula shimti ban leit rah ia katei ka rai, sha ka jingtip jong ka sorkar Jylla bad la iathuh ba ka kashari, kan lah ban tih bniah ia katei ka kam, lada jia ba kito kiba mad ia katei ka jingeh, kin leit dalade hi sha ka kashari.
Kham mynshwa, lah ban pynkynmaw ba ka sorkar Jylla, ha ka 29tarik Iaiong 2020, ka la rai ban buhteng ia ka jingsiew ia ka tulop u myntri rangbah bad kiwei de ki myntri sorkar Jylla, da 50 percent, nangta sa 50 percent ia ki ophisar IAS bad kiwei, nangta 35 percent ia ki Group A and B bad 25 percent ia kito kiba hap ha ka Group C. Katei ka jingot tulop, kan nym trei kam ia ki nongtrei jong ka tnat Police bad ka Health Department bad katei ka jing ot tulop,kan trei kam ia kiwei ruh kiba ioh jingiarap lyngba ka sorkar Jylla, tangba katei ka hukum kan nym trei kam ia kito kiba don ha ka Group D bad ia kito kiba dei ban siew bai tymmen. La ong ruh ba ia katei ka pisa, yn sa siew hadien ba ka jingdon pisa ka sorkar Jylla, kan sa wan kham bha.
Phi don ban ong eiei?