Hadien U Bhupesh Chaudhury, uba dei u ophisar IAS, uba trei ha Mizoram, mynta ula mih sa U Krishna Mohan Uppu, uba trei ha katei hi ka Jylla, ha kaba ula ujor sha ka tnat kam poh iing jong ka sorkar India bad ka daw ka long, namar ba ma u, ruh ula shah khang lynti ban leit sha ka jingrakhe Republic ha ka 26tarik Kyllalyngkot 2019 ha Aizawl.
Ka dur kaba don ha ka twitter peij jong U Krishna Mohan Uppu, kaba pyni, ba ula shah khanglad ban rung sha ka rakhe Republic Day.
Ha katei ka shithi, U Uppu, uba trei kum U Additional Chief Electoral Officer ka Mizoram, ula ong ba um pat ju lap ia kaba kum katei ka jingleh niewbein ia u, kum u shakri Sorkar. U Uppu, u iathuh ba ula poi ha ka madan Assam Rifles, ha ka por 7baje mynstep, hynrei, ula shah khang ban leit sha katei ka jingrakhe Republic.
Ha katei ka shithi jing ujor, U Uppu, ula ong ba haba ula shah bat ha ki kynhun sengbhalang bad da ka jingsngew artatien, ba kan lah ban mih kano kano ka jingjia kaba sngewsih, kumta ula hap ban mih noh bad leit phai na katei ka jaka, hadien ka jingap bad iakren bad ki kynhun sengbhalang, kaba neh shi kynta.