Ujor ri dohkha, ki saw Shnong ha Wah Umngot

Shillong, 21 Naitung:
Ha ka jingiakynduh ka Synjuk ki saw shnong, kata ka Lymba, Kong wang,Darrang bad Dawki ka la iakren ia ka jingeh jong ki sawshnong ha kaba iadei bad ka wah Umngot, ka la iakren sani bha ha ka ba iadei bad ka thwei kaba la pynkylla jaka ri dohkha tang na ka bynta ka jingmyntoi kawei ka shnong da u Deputy Commissioner Jowai order No.GEN/Fishery-97 2006/358-4 Dated 10/07/2013 kaba dei hok da ka Jaintia Hills Autonomous District Council(JHADC)Jowai.
Ka synjuk ka dap da ka jingsngew lyngngoh ban don 2 tylli ki pung ri dohkha, namar naduh hyndai ka la don lypa ka thwei sharei kaba dei ka Reserve & Preserve na ka bynta ka wah Umngot hi baroh kawei.Ka synjuk ka la dawa mardor na ka JHADC Jowai ba ka dei ban pynshai halor kane.
Ka synjuk ka la rai ruh ban pyrshah halor ka jingdie wai tong dohkha da ka District Council Jowai 2014-15 kaba la dep khot tender da ka District Council No.JHADC/ASFM/F/18/2004/213 ha baroh shilynter jong ka wah Umngot.
Ha kajuh ka por ka synjuk ka la iatai bha halor ka jingwankit tuh ia ki Mawron (Boulder) da 40-50 tylli ki lieng jong ki khar Bangladesh khamtam eh ha ka por miet lyngba ka wah Umngot bad ka la kyrpad ruh ia ki bor bahalor bad ba dei peit kum ka District Council-JHADC,KHADC,Deputy Commissioner Jowai,SP Jowai SDO Amlarem bad ki heh BSF ban shimkhia halor kane.
Ka synjuk ka dap da ka jingsngewkhia, ba wat hadien ba la dep ia jingthoh lyngba u BADO Dawki sha ka tnad Border Area ba dei peit ia ka jingbym trei kam shuh ka ropeway kaba don ha shnong Kongwang. Hynrei na ka liang ki bor ba dei peit kim shym la suit niew ia kane.
Te ka synjuk ka la kyrpad jur ia ki paidbah jong ka Elaka Darrang ban ia snoh kti lang bad ka synjuk khnang ba ka jingjop ka jong ki kan long ka jingjop jong ki piadbah ka Elaka hi baroh kawei.