Ujor pynlip ding sha Laitlyngkot

Shillong, 31 Jymmang:
Ka FKJGP Laitlyng-kot Circle ha ka 30tarik Jymmang 2017 hapoh ka jingialam jong u Bah Edarland Kharbudon, President FKJGP Laitlyngkot Circle, ha kaba la synran lang ruh da u Samla Kitboklang Nongphlang Education Secretary FKJGP Central Body bad u Samla Mac Donald Kharkongor, Vice President FKJGP Upper Shillong Circle ki la leit ban iakynduh ia u Chief Engineer (Distribution) jong ka MEecl U Bah K.N. War ban iakren ia kitei ki jingeh jong ki paidbah da kaba kyntu ia ka MEecl ba kan pynjynsur noh ia ka jing pyn lip ding bad ban rah noh ia ka por jong ki kynta pynlip ding, namar na ka liang jong ka Seng kam don satia kano kano ka jing pyrshah ha kaba iadei bad ka jing pynlip ding, hynrei ka shu pyrshah tang ia ki kynta ba pyntreikam ia ka namar ka ktah shi katdei eh ia ki paidbah Nong Shong Shnong.
Katei ka jing leit iakynduh jong ka Seng ka long kaba seisoh namar ba na ka liang jong u Chief Engineer u la kular ban shimkhia ia ki jingdawa jong ka Seng bad ruh ban pyntreikam mardor khnang ban weng ia ki jingeh ba ki paidbah Nong shong shnong jong ka Shnong Laitlyngkot ki iakynduh.
Katei ka jingpynlip ding ka la sdang naduh ka por 6:00baje mynstep haduh haduh ka por 9:00baje mynstep, namar ba ha kitei ki kynta kidei ki kynta treikam kiba baroh ki Longing ki dang bunkam ha ka shet ka tiew bad kiwei de ki kam ing kam sem ban pynbit pynbiang ia ka jing leit skul jong ki khun ki kti bad ha shwa ban kin leit shala ki jong ki ka ki jam.