Bunsien la ju iohi ha ki khubor ba ka bank ka shah tuh pisa, hynrei mynta pat ka la jia da khongpong ha kaba ka la mih ka jingkynnoh ba ka bank ka la tuh kylla na ki nongthep pisa. Kane ka la jia ka la jia ha ka Meghalaya Rural Bank ne ka Bank nongkyndong kaba don ha Mawlai Nonglum ha kaba iwei i longkmie i la ujor ba katei ka Bank ka la pynjah ia ka pisa jong i kaba haduh T.60,600 tyngka.
I kong Sylvia Neng nong iba shong ba sah ha Mawsiatkhnam Nongkya, i la iathuh ba ha ka jingleit thep pisa kaba khadduh eh jong i ha kane ka taiew ba la dep kumba iuh tdong bsein i la kyndit thret ba haba la pynbiang jingkhein ha ka pass book jong i, i la lap ba ka pisa jong i kam don kumba i la thep. Katkum ka jngiathuh jong i , i la sei pisa na katei ka bank tang lai sien sei kaba la kot sha ka T.19 hajar tyngka “Haba la iathuh ia nga ba ka pisa jong nga ka don sa tang kattei nga la kyndit thret bad nga la pyrshang ban ia kren bad u Branch Manager katei ka Bank” ong i kong Sylvia da kaba i la iathuh ruh ba ha katei ka jingpyrshang jong i ban ia kren utei u Manager u la kren khor pynban ia i ha kaba u la bat ruh ia ka pass book jong i haduh lai sngi.
Hadien ki jingkut lad namar ka jingbym ailad jong u Bah Mike L Chyne u Branch Manager ka MRB Mawlai Nonglum ban iakren, i kong Sylvia, mar-mar i la leit ban ujor ia kane sha ka KSU Mawlai Circle ha kaba ki dkhot ka KSU khlem pynslem ki la leit ban ia kynduh ia utei u Manager. Ha katei ka jingleit ban ia kynduh bad ki dkhot ka KSU, u Bah Mike u la len ba u la ong ba ia ka pisa jong i kong Sylvia la ot, namar ba i bah khlieh ia uba shim ram na katei ka bank, kaba i kong Sylvia im don jingtip eiei ia kata.
Hadien ka jingiatainia kaba jur ha katei ka Bank, u Branch Manager katei ka Bank u la pynphai ia ka pisa jong i kong Sylvia T.24 hajar tyngka da kaba kam ba ka don ka jingbakla ha ka jingtreikam, katba um shym la pynphai pat ia ka T.36,600 tyngka kaba dang jah klep. Hadien ka rai kaba la ioh na u Manager ba ym lah ban pynphai ia kata ka T.36,600 tyngka kaba la jah kaba u la kynnoh ba la sei hi da i kong Sylvia da kaba shu shon kti, i kong Sylvia ha ryngkat ka jingsynranlang jong ki dkhot ka KSU Mawlai, i la ujor sha Mawlai police Station pyrshah ia utei u Manager Bank.
Haba kren sha ki nongthoh khubor i kong Sylvia i la ong ba i long tang i nongrep i bym nang wat tang ban soi ia la ka kyrteng, hynrei i la soi kyrteng hangtei tang da kaba shon kti, “Haba nga ia kynduh ia u Manager u ong beit ia nga ba nga la sei, hynrei nga kynmaw kyndiang ba nga khlem sei pisa lait noh ka T.19 hajar tyngka kaba nga la sei laisien” iathuh i kong Sylvia ba ha kine ki khyndiat sngi ba la dep ka la mih ka jingiania kaba jur ha katei ka bank bad ki nongtrei jong ka ha kaba ma i -i la byrngem kylla ban ai pulit katba na ka liang u Manager pat u la ong ba lada ki ai pulit kin hap ban siew ia ka bai mynrain khmat lada lap ba um don jingbakla. I kong Sylvia i la iathuh shuh shuh ba utei u Manager u la pyni daw nyngkong da kaba kynnoh ba i la bah khlieh na ka bynta u nongshim ram kaba im shym la bna eiei , bad lada pyrkhat kumno i briew iba dei tang i nongrep in lah ban bah khlieh na ka bynta u nongshim ram, i la ong ruh ba kham hadien u la ai daw pat ba i la sei hi ia ka pisa da kaba pyni ia ka dak kti kmie kaba la shon ha ka kot sei pisa kaba ma i i la kyntait war ba kam dei ka jong i.
Haba la pyrshang ban iakren bad U Bah Mike, uba dei U Branch Manager, ym shym la ioh iakren satia, namar ba um shim satia ia ka mobile jong u.
Phi don ban ong eiei?