Ujor kylla U Wanglet ia ka nongpahara

Shillong,13 Nailar:
Ki pulit ka jylla ki La iathuh ba kin phah ia karai ba khadduh jong ki sha ka Ing Bishar ka jylla hadien ba kin pyndep ia ka jingtohkit ia u Myntri barim ka sorkar Arunachal pradesh uba la shah kynnoh ba u la kren kynshlein ia ki kynthei kiba ap pahara ha ka madan ia tied Golf.
Ki pulit ki la kem ia u L.Wanglet mynhynnin ka sngi hadien ba la ioh ka jingujor na ka CSWO ba u la kren tohmet da ki ktien sih ktien sang ia kawei ka nongap pahara ha katei ka madan ia lehkai.U SP ka East Khasi Hills Bah M Kharkrang u la iathuh ba hadien ba la pyndep ia baroh ki jingdonkam ban tohkit ia katei ka jingjia ki pulit kin sa phah ia ka rai kaba mih na ka jingtohkit sha ka Ingbishar. “Ka Ingbishar kan sa shim ia ka rai ba khadduh jong ka halor katei ka phang” ong u Bah Kharkrang.
Lah ruh ban pynkynmaw ba u Wanglet u dei u dkhot jong ka Shillong Golf Club. La kem ia u mynhynnin ka sngi, hynrei la pyllait noh ia u mynta ka sngi hadie ba u la ioh jamin. U Wanglet u la ujor kylla sha ki pulit ka Sardar Police station ba ha ka 19 tarik u bnai ba la dep uwei u rangbah ba la tip kyrteng kum u M.Marak ryngkat bad kawei ka nongap pahara kynthei ha Golf ki la byrngem ia u.