Nongpoh:Uwei u rangbah uba la tip Bah Starling Laking 69 snem ka rta, na ka shnong Bara Killing ha Ri Bhoi, u la jah noh na la iing naduh ka 11 tarik mynta u bnai ha ka por 2:30 baje ei ei janmiet bad haduh mynta um pat wanphai satia sha iing.
Haba iadei bad katei ka jingjah utei u Rangbah, na ka liang kiba haiing jong utei u rangbah, ki la leit ban pyntip lyngba ka ejahar sha ki Pulit ka Khanapara Police Station, khnang ba ki pulit kin ioh ban leh ia kaba donkam bad khamtam ban iarap ha ka ban wad ia utei u rangbah.
La ong ba ha ka por ba utei u rangbah, u mih na iing, u la rah ia ka Mobile phun kaba don ia u number 9401459247, hynrei naduh katei hi ka sngi, ka Mobile phun jong u ka la switch Off. Ki la pynpaw ruh ha ka ejahar, ba ki la pyrshang ban wad, hynrei kim shym la lap satia.
Haba batai halor ka jinglong utei u rangbah, ki la pynpaw ba u dei uba don ia ka dur kaba long pyllun, ka rynieng kaba 5.4 phut, u shniuh ba iong bad ha ka por ba u mih na iing, utei u rangbah u phong ia ka patlun rong iong, ki slipar rong btuh bad ka sopti rong lieh khleh jyrngam.
Phi don ban ong eiei?