Ujor ki pulit ka Ri Bhoi, pyrshah ia u Editor ka G-Plus na Guwahati

Nongpoh: Ki Pulit ka Ri Bhoi, ki la ujor pyrshah ia u Editor ka G-Plus ka Kotkhubor na Guwahati, namar ka jingpynmih jong ka ia ki khubor lamler ne ki khubor bym don nongrim bad khamtam eh halor ka jingkynnoh theh umphniang Diesel bad Mobil ha ha shilynter ka surokbah NH-6, na ka ban pynapshrip ia ki kali na Assam.
Haba iadei bad katei ka jingujor pyrshah ia katei ka kotkhubor, u Bah C. Syrti, SP ka Ri Bhoi, u la ong ba ka nongrim kaba la pynlong ia ki Pulit ka Ri Bhoi, ba kin ujor ia u Editor jong katei ka Kotkhubor, ka dei halor ka nongrim ba katei ka Kotkhubor, ka shait mlien bha ban pynmih ia ki Khubor lamler bad kiba la ialam bakla ia ki paidbah bad khlem da wad ia ki jingshisha, khamtam eh haba iadei bad ka jingkylla khah khah ki kali na Assam haba ki iaid lyngba ka surokbah NH-6, ha kaba la mih ka jingkynnoh ba ki briew na Meghalaya ki theh umphniang Diesel bad Mobil ha shilynter ka surok NH-6, na ka bynta ban pynap shrip ia ki kali na Assam, khnang ba kin ioh pisa haba ki leit ban iarap ia kitei ki kali kiba la kylla ha nala.
Shuh shuh, u la ong ba ha ka jingshisha ki Pulit, ki don bynta ei ei ban pyrshah halor katei ka jingpynmih khubor jongki, hynrei ka nongrim hi kaba la pynlong ia ki pulit ba kin ujor pyrshah, ka dei hadien ba katei ka kotkhubor, ka la pynmih tang ia ki khubor bym shisha bad khlem da wad ia ki jingshisha lyngba ki Pulit ka Ri Bhoi bad kaba la wanrah ruh ia ka jingiapher hapdeng ki briew na Meghalaya bad Assam.