Shillong, 06 Naiwieng:
Ki nongthoh khubor ka nongbah Shillong ki la ujor sha u Deputty Commissioner ka East Khasi Hills u Bah Peter S Dkhar halor ka jingphet jyndat ka kompeni Reliance Communications Ltd, khlem da pyntip shwa ne ailad ia ki paidbah ka jylla.
Ha ka jingujor ki nongthoh khubor ki la ong ba kane ka kompeni, ka la pynthut ia ka network naduh ka 25 tarik Risaw haduh mynta bad ka ophis jongka, ruh la shu khang dam khlem da pyntip paidbah shwa ban leh ia kane.
Baroh ki nongpyndonkam da kane ka kompeni naduh kiba leh pre-paid bad post-paid ki la sah ha ka lyngngoh ngain ia kane ka jingleh ka kompeni.
Halor kane, la kyrpad ia u DC ba un tuklar ban hukum ba kane ka kompeni ka dei ban siew bailutksan ia ki nongpyndonkam namar ka jingleh bym suidniew jongka ia ki paidbah.