Ujor ki nong Mawlai ba pyniaid shi kali ha ka by pass thymmai

Shillong:Ki nongshongshnong jong ka shnong ka Mawlai Mawkynroh ryngkat u nongialam ka MPGF u bah Marbud Dkhar, u Rangbah shnong bad Secretary shnong ka Dorbar Shnong Mawkynroh, ki trai jaka ki la ia kynduh mynta ka sngi, ia u SP ka traffic bad ki pulit ka out post mawlai ryngkat kiwei kiwei de ki riew rangbah ka shnong kiba la pynpaw ia ka jingpyrshah halor ka jingpynlong one way ia ka Mawlai by-pass, kaba dang shu shu plie dang shen.

Kane ka jing kynduh ka long hadien ki jingud jingnam ki nongshong shnong bad ki trai jaka kiba hap iaid lyngba kane ka surok ha bun ki jingdonkam jong ki kumba ki ju leh ha ki por barim. Ka jingiakren ka long beit ban shah ia ki trai shnong ban iaid nangne khlem ki jingshah pyndik ha ki bor khmih lynti syngkien.

Na ka liang u Rangbah shnong u la iathuh ba kane ka jingleh ka lah buh jingeh shibun ia ki trai shnong kiba trei ktah sha kine ki lum bad kiba dang sdang ban shna la ki iing ki sem.

Haba iathuh ia ki jingeh jong ki nongshong shnong U Bah Marbud Dkhar u lah pynshai ba ki nongshong shnong ki don ki lum jingtep, ki jaka lehkai bad ki pynthor bad kiwei kiwei de ha kaba ki hap ban iaid na kane ka lynti barabor.Hynrei da ka jing mana ban iaid ar lynti lyngba kane ka surok ka lah buh jingeh shibun eh ia ki trai shnong kiba hap tawiar jngai pynban mynta.

Ha ka jingleit peit ia katei ka surok u bah Marbud, u ong ruh ba wat ka surok ruh kam pat shem dep paka ha bun ki bynta hynrei la shu plie kyrkieh bad bun ruh ki trai jaka kiba lah ai sbun khlem ka dor na ka liang ka Sorkar ki lah byññiaw ba ka sorkar kam shem pyrkhat na bynta jong ki.

Na ka liang U SP traffic u la sngap ia kine ki jingud u paidbah bad u la kular ban rah ia kine ki jingujor sha ki bor ki ba dei nan peit.