Ujor ki kontraktor Jylla, ba khanglad ka ADB

Shillong, 22 Nailar:
Ka All Meghalaya Contractor & Suppliers Association (AMCSA), ka la ujor tyngeh, halor ka jingthmu jong ka Asian Development Bank (ADB), halor ka rukom pyniaid jongka, ia ki skhim kiba dei ban pyntreikam ha ka jylla Meghalaya.
Ka ADB, ka don jingthmu ban tei pynbha ia ki skul, ha ka Jylla bad lyngba katei ka jingthmu, ka don ka jingkhmih lynti, ba katei kan ailad ia ki samla trai shnong, ba kin ioh ia ka kam ka jam, lyngba katei ka skhim jong ka sorkar jylla bad ka ADB.
Ka seng, ka ong ba lyngba katei ka jingtrei, dei ban ailad ia ki kontraktor trai shnong, ba kin trei ia katei ka kam, lane kaba long ba uwei u kontraktor, un trei ia kawei ka skul; hynrei na kaei kaba la paw ha ki kotkhubor, la pyni, ba katei ka jingthmu jong ki kontraktor, kam shym la urlong satia bad kumba la iakren hapdeng ki kontraktor bad katei ka kompeni, ha ryngkat ka jingdon lang jong ki bor jong ka PWD jong ka sorkar jylla.
Halor kane ka phang, ka seng ki kontraktor, ka dawa ba de ban pynbeit ia katei ka jingthmu kaba mynta jong ka ADB bad lada jia ba kim lah ban leh da kumwei, ka seng ka byrngem, ba kan leit sha kashari, na ka bynta ban pan ia ka rai, lyngba ka iingbishar, ong ka kyrwoh na U bah BL Nongbri General Secretery, AMC&SA.