Shillong: Ka Joint Action Committee jong ka MeECL Suppliers and Contractors (JACMSC) ka la wan kynduh ia u myntri ka tnat pynmih bording u James K Sangma, halor ka jing shah pynduh kam ki kontraktor ka jylla.
Haba kren bad ki lad pathai khubor,ha ka sngi balang hadien na ka liang u Chairman ka JACMSC u bah H. Rumnong u la iathuh ba don katto katne ngut ki kontraktor ka jylla, ki la ioh ban ban pynpoi ia ki tiar ki tar na ka bynta ban pyntrei hapoh ka Mawlai Sub-Station, hynrei na ka liang ka Meghalaya Electricity Corporation Limited (MeECL) dang shen ka la pynmih ia ka hukum ba la pynduh noh ia ka bynta jong kine ki kontraktor napoh ka jylla.
U la ong ruh ba kane ka jing leh jong ka Board of Directors ka Meghalaya Power Transmission Corporation Limited (MePTCL) ka long kaei kaei ka bym lah ban pdiang bad ka dei ruh kaba beain bad halor kane, ki la kyntu ia u myntri ban leh ia kaba donkam naka bynta ban kyntiew ia ka ioh kam ioh jam ki paidbah hapoh ka jylla.
Ka JACMSC ka la shim iaka ‘Resolution’ ba ia kino kino ki jait kam ban pyn ioh ne pynpoi ki mar naka bynta ban pyndonkam hapoh ka tnat pynmih bording ka jylla, ka MeECL ka dei ban ai shwa ia ki kontraktor jong ka jylla bad lada ki briew bapoh ka jylla kim lah ban pyntrei ia ki jait kam ka MeECL ka lah ban khot kontraktor bana bar jylla ne na bar ri.
U la iathuh ruh ba ki don haduh 11 tylli ki hukum ban thied mar ha ka dor kumba T. 9.3 klur bad ki kontrator ka jylla ruh ki la sdang ia ka kamram jongki, hynrei ha u bnai Kyllalyngkot 2020 ka la don ka jingialang ki Director ka MeECL bad la shim iaka rai ban pynduh noh ia ka kam.
U la iathuh ruh ba ka JACMSC ka la pan jing shai naka tnat pynmih bording halor ka jing shah pynduh kam ki kontraktor, hynrei haduh mynta na ka liang ka tnat kam shym la pynshai halor kane.
Haba dei bad ka jing kular u James Sangma, na ka liang u bah Rumnong ,u la iathuh ba u myntri ka tnat sam bording u la kular ban shim khia ia kane ka mat ka JACMSC bad shen un sa lum ka jing ialang.
Phi don ban ong eiei?