Jowai: Ka Seng ki Driver Trok kaba la tip kum ka East Jaintia Hills Driver Association, ka la ujor ia ki karkhna dewbilat kiba don ha East Jaintia Hills sha u Deputy Commissioner, halor ka jingbym shym la pynbiang kitei ki company ia ka umbam, ka painkhana bad ka jaka ban shet bad ruh ka jaka sum bad jaka shong thait.
Ki driver ki hap ban ap 2 haduh 4 sngi ban ioh pynhiar lane kit ia ki mar kitei ki karkhana ban shallan shabar jylla bad ruh ki mar kum ki fly-ashes kiba la wan rah na Assam. Hynrei ki driver kim don ia ka painkhana kaba biang kaba khuid bad ka umbam umdih kaba biang. Bun na kitei ki driver ki ia shet hi ia ka ja ka jhur ha kitei ki jaka pynieng kali jong kitei ki company, hynrei ka la buh jingeh ia ki lada jia ba slap, la ong katei ka seng ki Driver.
Ka seng ka la leit buh ia ka jingujor ia kitei ki jingeh ki driver sha u Deputy Commissioner ka East Jaintia Hills, ha kaba na ka liang jong u DC ruh u la kular ban shimkhia ia kane.
“Bun na ki driver ki leit painkhana sha khlaw bad kane ka la pynjakhlia ia ki jaka kiba don sawdong kitei ki karkhana bad ngi la kyntu jur ia u DC ban shim khia ia kane na ka bynta ka koit ka khiah bad ka bha ka miat jong ki driver bad ruh ia ki paidbah nongshong shnong kiba don marjan bad kitei ki kharkhana pynmih dewbilat”, la ong u Sakilon Chyrmang President ka Seng.
“Ngi la leit jurip ia ka Green Valley Cement Pvt. Ltd, ia ka Star Cement bad ia ka JUD. Ka Green Valley ka don ka painkhana kaba ym long ban pyndonkam, ka jaka shet kaba rit eh katba da ki spah ki trok ki ieng ha katei ka jaka pynieng kali jong ka, Ka Star Cement ka don ka Painkhana hynrei ka um kam shym la pynioh ia ki driver katba ka jaka shongthait (Rest Room) na ka bynta ki driver, ym shym la ai lad pat ia ki ba kin pyndonkam ia ka”, la ong u Geral Phawa uba dei u Genl Secretary ka seng.
U la bynrap shuh shuh ba ka JUD, ka Amrit bad ka Gold Stone kiba dei kiwei pat ki karkhana pynmih dewbilat kim don satia ia ka painkhana bad ka um na ka bynta ki driver.
Phi don ban ong eiei?