Ujor ki ar seng, ba pyntrei ka kompeni ia ki trai Jylla ha ka Sngi U Blei

Shillong: Ka EJNC – Central Executive Council & HANM – East Jaintia Hills, hadien ba la ioh ia ka jing ud jing nam jong ki kmie ki kpa jong ki nongtrei Trai Jylla jong ka 1 India Family Mart kaba don ha Khliehriat East, ba ki khun jong ki ki hap ban leit trei wat ha ka sngi u Blei ruh, kumta ki nongialam jong ki 2seng hapoh ka jingialam jong u Bah Sambormi Lyngdoh, President EJNC – CEC bad u Bah Ency Shadap , President HANM – EJHD, mynta ka 11tarik ki la leit ban ia kynduh ia ki nong pyniaid jong katei ka Mall ban iakren halor katei ka jingeh kaba ki Trai Ri Trai Muluk ki ia kynduh.

Haka jing iakren bad ki nongpyniaid jong katei ka Mall, na ka liang jong ki 2seng ki la daw na ki nongpyniaid jong katei ka Mall ban ai Shuti noh haka sngi u Blei ia ki nongtrei Trai Jylla kiba trei hapoh katei ka Mall bad ruh ban ai shuti ha manla ki sngi Kyrpang jong ki nongshong shnong jong ka Bri u Hynniewtrep.

Haba iakren bad ki nongialam jong ki ar seng, na ka liang jong u Dhan Rani Das uba dei u heh jong katei ka Mall ula kular ban shimkhia ia kitei ki mat jing dawa jong ki 2seng bad ban iakren bad ki bor ba halor jong katei Mall halor kitei ki mat.