Ujor khaw reshon na shnong Kongthong

Shillong:Ki nongshong shnong jong ka shnong Kongthong kaba hap hapoh ka Sohra Civil Sub Division ki la phah ka jingujor sha ka Deputy Commissioner ka East Khasi Hills District halor ka mat kaba iadei bad ka jingsam ia u khaw Ration ha kane ka shnong kaba la shimti da u Sylloklang Majaw uba kam ialade kum u Sordar ha ryngkat bad u Stogent Lynrah uba kam ialade kum u Secretary.

Ka jingphah ia kane ka jingujor sha ka Deputy Commissioner East Khasi Hills, kaba la kyrshan da ki 26 ngut ki nongshong shnong jong ka shnong Kongthong kiba dei ruh ki Ration Card Holders, ki la pynpaw ka jingpyrshah kaba jur ia u Sylloklang Majaw bad ia u Stogent Lynrah kiba la ioh bor na ka Office jong u Sub Divisional Officer, Sohra Civil Sub Division, ban sam ia u khaw AAY bad PHH ha ka dor kaba 5 tyngka shi kilo na ka dor kaba 3 tyngka shi kilo kumba la buh beit buh ryntih da ka sorkar.

Ka jingphah ia kane ka shithi jingujor ka long ka jingkyrshan ia ka shithi kaba lah dep phah myn ha ka 18 tarik u Iaiong kaba pynpaw ia kajuh ka jingujor, kata ka jingdie palat dor ia u khaw da u Sylloklang Majaw bad u Stogent Lynrah. Bad ha kane ka kynti ia kane ka jingdie beain jong ki ia u khaw Rishon la lap bad sakhi ruh da u Magistrate u Shri P.S Tynsong ha ka sngi ba u wan pynlong ia ka Inquiry kata ha ka 14 tarik Iaiong 2020, bad na ka liang jong une u Magistrate ruh u la kubur ia kane ka jingdie palat dor jong kine ki ar ngut na ka dor ba la buh da ka sorkar.
Hadien ba la lap ia ka jingshisha ha ryngkat ki bor ba halor kane ka kynhun lyngba kane ka shithi jingujor bad kum shi bynta ruh na ka liang ka shnong Kongthong ka buh ka jingkyrpad ia ka Deputy Commissioner jong ka East Khasi Hills District ban weng mardor ia kine ki briew bad ruh ban pynshitom ia ki katkum ba shong ka ain.