Ujor ka seng samla Lumkshaid ba ioh khaw tad kiba riew spah

Shillong, 18 Rymphang:
Ka Seng Samla Lumksaid, Mawprem, ka la ujor sha u Deputy Commissioner ka East Khasi Hills, halor ka jingrung kyrteng kiba riew spah bad ki nongtrei sorkar ban ioh khaw tad ne ka National Food Security Scheme (NFSS), katba kiba duk kim shym la mih kyrteng satia.
Ka seng ka la ong ba bun bah ki kyrteng jong ki briew kiba duk kiba jynjar, kim shym la mih satia katba don ki bym sah ha shnong ruh, ki don kyrteng.
Ka la ong ba kane ka jingdkoh ha ka rukom pynrung kyrteng ia ki briew ba dei hok ban ioh bynta na kane ka skhim marbam tad, ka dei namar ba la pynlong ia ka jingsurbe 2011 khlem ka jingiasyllok bad ki nongsynshar shnong bad, la donkam ban pynbeit ia kane ka kam mardor, khnang ban pynthikna ba kiba duk ki dei ban ioh ia ka bynta kumba dei hok, la ong u Bah S Bareh u President ka Seng.