Shillong: Ka MP Lok Sabha jong ka seng Congress na Silchar, Assam ka la ujor sha u myntri ka tnad kam pohing jong ka Ri u Rajnath Singh bad ka la kynnoh ba ki pulit Meghalaya ha ryngkat ka jingiatreilang bad ka Khasi Student’s Union (KSU) ki la pyndik ia ki briew kiba Cachar District ka Assam kiba mut ban rung sha Meghalaya. Ka la ong ruh ba kim shym la shah ia ki briew na katei ka District ban rung hapoh Meghalaya khlem da pyni ia ki kot jingpynshisha ba ki dei ki nong India. Ka la kynnoh ruh ba ki dkhot ka KSU ki shoh ia ki tei ki briew kiba na Assam.
Ka la ong ba katei ka jingleh ki pulit Meghalaya bad ka KSU ka dei ka jingpynkheiñ ia ka hok ki nng India ban iaid na kawei ka jaka sha kawei pat hapoh India. Ka la ong ba katei ka jingkhanglad ka la mhi hadien ba ka sorkar Assam ka la pynmih ia ka thup kyrteng ki briew jong ka lyngba ka NRC. Ka la kyntu ia u Rajnath ban leh eiei noh, naba ka la ong ba ka don ka jingtieng jingsmiej ia ki briew ka konstitwensi jong ka.