Nongstoiñ: Kawei ka longkmie kaba la 38 snem ka arta na ka shnong Mawmluh-I Rambrai, ka la leit ban ujor hynnin ka sngi, da ka ehajar ha thanad Nongstoiñ pyrshah ia la u jong u tnga, da kaba kala kynnoh ruh ba u la wan ban byrngem byrsit ia ka lem bad ia ki ba haiing jong ka.
Katkum ka tyllong khubor ba la ioh lum na ki pulit, la ong ba u tei u tnga jong katei ka longkmie, u bala tip kyrteng kum u Stewell Rongrin 28 ka arta u ba la iashong khlad noh shipor bad katei ka longkmie ha ka 16 tarik mynta u bnai, u la leit sha shnong jong ka lok ha ryngkat ki tiar pynmynsaw kum u nar rod bad ka tari, ha kaba u la byrngem ruh ban thang syndon ia ka iing jong katei ka longkmie.
Shuh shuh ka tyllong khubor ka iathuh ruh ba u tei u briew u la pynjulor ruh ia ki katto katne ki bynta jong ka iing ka jong katei ka longkmie bad na ka liang jong ki pulit ka Nongstoiñ Police station, hadien ba ki la ioh ia katei ka jingujor ki la leit sha katei ka shnong ban pynlong ia ka jingtohkit bad ki la lap ruh ia ka jingshisha katkum ka jingujor jong katei ka longkmie.
Kumta ha kaba iadei bad katei ka bynta na ka liang jong ki pulit ki la rejistar ia ka kes katkum ka kes number 71(9)18 U/S 506/427 IPC bad kila kem noh ruh ia u tei u tnga jong katei ka longkmie bad ka jingtohkit kaba bniah halor katei ka bynta ka dang iaid shakhmat.