Ujor ka kynhun ki nongri sniang ba jyllei ka jing shalan da ki sniang, na shabar ka jylla

Nongpoh: Mynta ka sngi, ka kynhun ki nongri sniang ha ka thain Killiang, Baridua bad Them Marwet, kiba don hapoh ka shatri Piggery Farmers of All Killing, Baridua & Them Marwet (Khanapara), ki la leit ban ujor lyngba ka dorkhas sha ka Deputy Commissioner, Ri Bhoi District, kata ban dawa na ka ba ka dei ban shimkhia halor ka jingjyllei ki Sniang nabar ka jylla bad kiba la ioh ban shalan beain sha ka jylla, khlem da don kano kano ka jingjurip ne khmieh bniah ia kitei ki Sniang, kiba la wan na shabar bad ban bam doh hapoh ka jylla.

Ka nongrim kaba la pynlong ia katei ka kynhun ki nongri Sniang jong katei ka thain ba kin ujor sha ka DC, ka dei hadien ba ki la ioh jingtip ba ki don shibun ki Sniang, kiba la wanrah na shabar ka jylla, ha kaba ki la shu wan beit beit sha ka jylla ban shalan sha ki iew ki hat bad ban bamdoh, hynrei kiba kum kitei ki sniang, kim don ia kita ki kot ki sla kiba biang, na ka tnat Animal Husbandry and Veterinary, khnang ban pynshisha la kitei ki sniang ki long ne em kiba bit ba biang ban bamdoh ia ki.

Ha katei ka dorkhas kaba ki la phah sha ka DC, katei ka kynhun ki nongri Sniang, ki la kynthoh, da kaba ong ba ki ong ba katkum ka jingtip jong ki, ka long ba ka Meghalaya state Animal Husbandry bad ka tnat Veterinary, ki la pynmih ia ki kyndon halor ka rukom shalan ia ki sniang na kawei ka jylla sha ka Meghalaya. Halor kata la bthah ruh ia kito ki nongshalan sniang ba ki dei ban pyntip sha ki Officer-in-charge jong ka Inner State posts, Byrnihat la kumno kumno 72 kynta shawa ba ki pynrung ia ki sniang nabar sha ba jylla, pynban kumba ka long mynta katei ka kyndon jong ka sorkar halor ki Sniang na shabar kam trei satia.

La pynpaw ruh, ba ka jingwan kito ki sniang nabar ka jylla, kiba la wanrah sha ka jylla bad kiba khlem da shah khmieh bniah ha ki doctor kiba dei peit, kan wanrah jingma eh halor ka jingpang sniang kaba la tip kim ka African Swine Fever bad ka ban sa ktah ia kito ki sniang kiba ri da ki nongri sniang kiba don ha ka jylla hi baroh kawei.

Kumta halor katei ka dorkhas kaba ki la phah sha ka DC, katei ka kynhun ki nongri sniang, ki la kyntu ia ka DC ba ka dei ban buh noh ia ka jaka ban peit bniah ia ka jingwan shalan beain ia ki sniang nabar ka jylla sha ki iew ki hat bad kumjuh ruh ki la kyntu ba ki bor ka ain ba ki dei ban khang noh ia kito ki iew, kiba la die ia ki Sniang kiba la shu wanrah nabar jylla bad kiba la shu buh beain khlem da ioh kano kano ka jingtbit na ka tnat Animal Husbandry & Veterinary department ka sorkar jylla.
Katei ka jingujor da katei ka kynhun ki nongri Sniang, ka la jia ruh hadien ba ki la lap ba ka la don kawei ka jingjia ba ki riew shim kabu, kiba la leit ban bret ia ki sniang ba la iap ha kawei ka jaka kaba don shnong Khasi-Killing, ka shnong kaba don harud ka lynti na Jorbil Killing bad kaba mih sha 13mer Tamulkuchi.