Ujor ka KSU sha U Dharmendra, ia ka NEHU

Shillong: Ka Khasi Students Union (KSU) ka la phah ia ka dorkhas sha U Dharmendra Pradhan, myntri ka pule puthi ka sorkar India.

Ka KSU, ka ai jingmut ia U Dharmendra, ba un thung noh, da ka kong Sherwin May Sungoh, kum ka Vice Chancellor ba thymmai jong ka North Eastern Hills University (NEHU), namar ba ka dei kawei, na kiba don ha ka thup, kum kaba bit ban shimti ia katei ka kam.

Ka KSU, ka la ujor ruh sha U Pradhan, halor ka rukom trei kam jong U Prof SK Srivastava, uba dei U Vice Chancellor ba mynta jong ka University, ha kaba ka la iathuh ba ka kyrdan jong ka NEHU, ka la hiar shi katdei ha kine ki sngi, ha kaba ka kyrdan jong ka University, ka la hiar na ka kyrdan ba 16 bad mynta, ka la nang noh ar sut sha ka kyrdan kaba 50, katba kum ka jingkhein jong ka National Institutional Ranking Framework. La ong ruh ba mynta, ki la iaid da ki snem, ha kaba ki don bun jait ki jing iakhih pyrshah ha katei ka University, ha kaba kiba bun ki kynhun ki la iakhih pyrshah, ia ka jing trei kam jong une U Vice Chancellor ba mynta.