Ujor ka KSU & ka shnong ia 5 ngut ki pulit ba shoh ia ki khynnah skul

Shillong, 18 Jymmang:
Ki bor shnong ka Nonghyllam ryngkat ka KSU South West Khasi Hills ki la ujor pyrshah ia 5 ngut ki pulit kiba la tip kyrteng kum u C.R Marak uba bat ia ka kyrdan Sub-Inspector, u Balbring G Momin u pulit 3rd Batallion MP, u Pyn-shangbun Shangpliang u SF-10 Commando, u Mathius Marak SF 10 Commando bad ia u Solomon R Marak u 3rd Batallion MLP.
U President ka KSU SWKH u samla Forward-man Nongrem u la ong ba kitei ki pulit ki la shoh ia ki bad pynmynsaw ia 3 ngut ki khynnah rit kiba dang hapoh ka 16 snem karta. Kitei ki khynnah kiba la shah shoh ki dei kiba la tip kyrteng kum u Phaskupar Nongtnger, u Manlyness Marngar bad ia u Manbha Hashah. Ka KSU ka la ong ba katei ka jingjia ka la jia ha ka janmiet 17 tarik mynta u bnai ha ka por 4 baje nohphai sngi katba kitei ki khynnah ki dang leit sum hajan ka skul Jingaiti Secondary School, Nonghyllam.
Ka khubor na utei u President jong ka KSU u la ong ba kitei ki pulit ym tang ba ki shoh briew hynrei u la kynnoh ba ki la pyrshang ruh ban rahbor ia uwei u khynnah rit ba dang hapoh ka 6 snem karta da kaba pyrshang ban thep ha ka kali ML05 G 7459.
La ong ba tang mar ia ioh jingtip ka KSU ka la hiar wut wut sha Nonghyllam bad ujor FIR halor kane. Katei ka seng ka la dawa ba ki bor ba hakhlieh ki dei ban pynshitom mardor ia kitei ki pulit kiba pynthud ia ka shongsuk shongsaiñ.
Ka KSU ka la ia kynduh ruh ia ka DC ka SWKH ka kong R.Lyngdoh ban ia kren ia katei ka kam ban pynshitom da kaba tyngeh ia kitei ki pulit.