Ujor ka KSU, bym lerkam ka Jio

Shillong:
Ka KSU Leimow Unit bad Jowai Unit mynta ka sngi, ki la leit ïa kynduh ïa u Manager ka Jio Company, ha ka ophis treikam katei ka Company, kaba don ha Jowai halor ka jingtlot ka rukom ai jing shakri katei ka Company ha ka ban pynbiang ïa ka Network ha ka shnong Mootyrchiah, Mukhap bad Mowkaïaw.

Ki nongïalam ka KSU ki ong ba ka jingthut ka network jong ka Jio Company sha katei ka thaiñ ka ktah, ym tang ïa ki kam ki jam, hynrei wat ïa ka pule puthi ki khynnah khamtam mynta ba ki hap ban leh da ka Online Class.
Ka Seng ka la ong ruh ba ka sepei ka jing pynïeng ïa u Tower sha kitei ki thaiñ, katba ka Network pat ka thut bad duna bha.

Ha kajuh ka por na ka liang ka Jowai Unit, ruh ka la ujor sha ki nongpynïaid katei ka Company halor ka jing bym shimkhia jong ki nongtrei katei ka Company ïa ki kam ba ka dei ban leh ha kaba ïadei bad kum kaba hap leit ai Connect Internet sha ïing ki briew wat hadien ba ki lah dep siew ïa ka bai connection.

Haka jing ïakynduh ïa u Manager katei ka Company u la kular ban shimkhia ïa ka jing ujor ka Seng na ka bynta ban suk ki paidbah. Ïa ki nongialam ka KSU Leimow Unit bad KSU Jowai Unit la ïalam da u Organising Secretary ka KSU Jaiñtia Hills District Unit u Samla Leningrad Tariang.