Ujor ka KSU, ban pynsangeh ia ka rukom siew bai bording lyngba ka UGO

Nongpoh:Ha ka kyrwoh kaba la phah sha ki lad pathaikhubor, u samla Ferdynald Kharkamni, President bad u Bah Joseph Lambok Rymbai, u General Secretary, kiba dei ki nongialam ka Khasi Student Union (KSU), North Khasi Hills District, ki la pynpaw ba hynnin ka sngi ki la phah da ka dorkhas sha ka Deputy Commissioner ka Ri Bhoi, kata na ka bynta ban pynpaw halor ka jingthmu ban treikam da katei ka UGO Billing System sha baroh ki Longing kiba pyndonkam bording ilektrik ha Ri Bhoi District.

Lah ruh ban kdew hangne ba ka KSU Ri Bhoi, dangshen ki la dep ban pynpaw ia ka jingpyrshah halor ka jingthmu ka MeECL kan pyntreikam da ka smart meter bad UGO Billing system, nalorkata ka la dep ruh ban pyrshah halor ka jingpynkhein kyndon ka COVID-19 da ka tnad MeECL bad ka Kompani M/s Satnam Global Infra Projects Ltd (JV), kiba la pynkhein ia ka kyndon COVID-19,da ka pynlong da ka prokram ai jinghikai ban hikai halor ka jingpytnreikam ka Smart Meter bad UGO Billing system sha ki Meter Reader shuwa ban pyntreikam ha Ri Bhoi khlem da burom ïa ki kyndon ba la buh da ka sorkar halor ki lad jingiada ban lait na ka jingshah ktah na ka khlam COVID-19.
Ka seng ka la pynpaw ruh ka jingpyrshah ban pyntreikam da ka tnad MeECL ryngkat ka Kompani M/s Satnam Global Infra Projects Ltd (JV), kaba dei ka Kompani na Delhi bad kaba yn pyntreikam ruh ïaka smart meter project lyngba ka ADB schemes (MPDSIP).

Ha ka dorkhas kaba ki nongialam ka KSU, ki la phah sha ka DC ki la dawa na ka DC ba ka dei ban phah pynsangeh pyntreikam ia ka UGO Billing system, namar katkum ba ka seng ka la ioh lum jingtip la lap b aka tnad MeECL ka la bthah ruh ia ki meter reader ha Ri Bhoi, ba ki hap ban pyndonkam da ki Androids device, ba ka MeECL bad ka Kompani kam lah ruh ban ai ba kin pyndonkam na ka bynta ka smart meter.

Namarkata, lyngba ka dorkar kaba la phah sha ka DC ka KSU, ka la dawa mardor ia ka Deputy Commissioner ba ka dei ban phah ban pynsangeh ha ka jingpyntreikam ia ka Smart Meter Project ha Ri Bhoi bad ka la kyntu ruh ba shuwa ban pyntreikam ka tnad MeECL, ka la dei shuwa ban ai jinghikai ne pynsngewthuh sha ki paidbah.