Ujor ka KSU, ba U Deshman Pradhan, ula dei u jait Chyrmang

Jowai, 18 Jylliew:
Wat la ka don ki ain naduh ki longshwa lyngba ki ain elaka, district council kaba khang pyrshah ia ki mynder ri ban ym kylla jaid ne kur sha ki khasi – Pnar, hynrei ki dang don bun kum kita kiba shim kabu ban pynkylla sha ka jaid pnar namar ka jingkheinsting jong ki bor kiba halor. Kum kine ki briew ki iohlad ban thep vote, applai skim sorkar, bad kiwei ki kam pynroi bad myntoi da kaba pynshah stieh ha ka kur pnar.
Hadien ka jinglap na ki sabut ba biang, ki nongialam ka KSU Sahsniang Unit, ki la leit ujor sha ka Smt D Syngai (MCS officer), ka magistrate ba dei peit ia ka elekshon, pyrshah ia u Deshman Pradhan uba shim ia ka jaid Chyrmang. Kane ka long na ka jinglap katkum na ka electoral roll 2013, part no. 22 ka 4 – Mowkaiaw Constituency kaba u shim ia ka kyrteng Mr. Deshman Chyrmang ha ka serial elector no. 250 bad ka EPIC ID: WGG0041079. Kane ka jingujor sha ka ophis u DC, ka long hadien ka jingbympatiaw jong u ia ka jingkyntu ka seng ban pynduh ia ka EPIC ID bad kiwei ki kot ki sla da kaba pyndonkam da katei ka jaid kur. Kumta ka seng ka kyntu ia ki bor jong ka ain ban leit tohkit ia kane ka kam namar ioh lehse ki don shibun ba kum kine ki jaidbriew hapoh ka ri jong ngi khamtam ha ka thain Jaintia kiba kum kine bad ruh ban pynshitom da kaba tyngeh ia ki bad ia baroh kiba donkti kat kum ki ain ki kyndon.
Ha kajuh ka por, ka seng ka lap ia ka jingai pathar ia ki ST certificate hapoh district. Kumta, ka seng ka kyntu ia ki bor Disrict ban pyrkhing ha ka ban ai ia ki ST certificate ia baroh ki khun shiteng jaid kat kum ki kyndon jong ka ain.