Ujor ka KHNAM sha U CEM, ba kam trai ki bym dei Khasi, ia ki jait Khasi

Shillong: Ka KHNAM Youth Wing, ka la thoh sha U Chief Executive Member, Khasi Hills Autonomous District Council bad U Deputy Chief Executive Member, Khasi Hills Autonomous District Council, Shillong, ha kaba ki la pyntip ba ki la lap ba bun ki briew ki bymdei ki khasi ki la kam trai ia ka jait ka khong jong u khasi ban pynmyntoi ia lade shimet, khnang ba lait na ka trading licence regulation 1954, ban ioh ia ka bhah jong ki scheduled tribe ha ki bynta ki bapher bapher bad kiwei kiwei de.

Katei ka seng, ka ong shuh shuh ba la lap ruh ba ki briew ki bymdei ki khasi, ki bym nang ban kren ia ka ktien khasi, ki bym tip ia ka riti dustur u khasi, ki bym bud ia ka rukom im u khasi, ki shim ia ka jait khasi tang da kaba leh affidavit lyngba ka jingsmai ha khmat jong u first class magistrate.

La ong shuh shuh ba ki don ruh ki briew ki bymdei ki khasi, ki shim ia ka jait khasi wat la ka kmie bad u kpa jong ki kim dei ki khasi, don ruh ki paradoh parasnam ki ba don ka jingsngewieit, sngewlem ba haduh ia ka jait ka khong ruh ki ai sngewbha ia ki briew ki bymdei ki khasi.
Ka KHNAM, ka ong ba ha ka “Khasi Hills Autonomous District (Khasi Social Custom of Lineage) Act 1997 ka jingmut “Khasi” la batai shai ba dei u/ka briew na ka khasi tribe u ba lah ban dei u Khasi, Jaitia, Pnar, Synteng, War, Bhoi lane Lyngngam u ba la ithuh katkum kane ka ain. Ki kyndon ki ba khlain jong ka Linage Act 1997 ki lah ban teh lakam ia kane ka jingshim jait pathar kaba lah ban pynjakhlia ia ka jaitbynriew ba kyrpang ka jong ngi
La batai shuh shuh ba ka shithi jong ka sorkar pdeng lyngba ka Ministry of Home Affairs No. 35/1/72-R.U. (SCT.V) tarik, the 2nd May 1975, ka batai shaphang ka jingshim kabu ia ka jinglong Scheduled Tribe/Scheduled Caste jong kiba bun bad ka batai ruh ia ki mat ki ba kongsan ki ba dei ban peit bniah shwa ban ai ia ki ST/SC.
Ka KHNAM, namarkata ka ka dawa jur na ka KHADC kaba dei ka nongri nongsumar ia ka riti ka dustur ka jinglong kyrpang jong ka jaitbynriew Hynniewtrep, ban pynkloi ia ka Clang Bill khnang ban lah ban teh song ia ki kur bapher bapher. Lada kane ka jingshimjait laitlan ka dang bteng lyngba ka jingshimsting jong ka council, kan bha ba ka council kan pynduh pyndam noh ia ka Lineage act, ong ka kyrwoh na U Bah Thomas Passah, President, KHNAM State Youth Wing.