Ujor ka KHNAM, halor ka jingpynbna thung kam ha CRD

Shillong: U President ka KHNAM u Thomas Passah u la phah la Memorandum sha u Director ka Community & Rural Development, Shillong ha kaba ia dei bad ki 6 tylli ki post Peon kiba lait hapoh kane ka Department bad kumba la pynpaw hapoh ka Advertisment ia ka last date ban pynpoi ia ki application ka long 28 tarik u November 2019.

Ha kane ka shithi ka KHNAM ka pynpaw ba haba don kano kano ka jinglait kam la ha kane ka department ne ha kiwei pat ki department, da ki lakh ngut ki samla ki thep ia ki application jong ki da ka jingkyrmen ban ioh ia ka kam ba ki thep. Hynrei ka jingleh shiliang khmat bad ka jingpynbam pisa ban ioh ia ka kam ka la pynduh mynsiem noh ia ki samla kiba thrang shisha bad kiba dei hok ban ioh ia ka kam.

Kumba ngi tip ba ka Personal Interview ka long kawei na ki daw ba ka corruption bad ka jingleh shiliangkhmat kan suh thied hapoh ka rukom thep kam bad pynlong ia kiba duk ban shim da ka ram tang ban ioh ban pynhun ia ki ophisar bad ki nongialam ka sorkar.
Katkum ka Advertisement ba kane ka department ka pynmih ka KHNAM ka pynpaw ka jingburom ia ka rai jong ka ban buh da ka personal Interview ban ioh ban pynrung ha kane ka post. Hynrei khlem da bishar ia ka rukom thung kam jong kane ka Department ka KHNAM ka pynpaw pat ba kumno kane ka Department kan tip ba u / ka ki long kiba bit ban ioh ia ka kam da kaba buh tang da ki katto katne ki jingkylli kaba tang ha ki minit ba khyndiat.
Da kane ka Memorandum ka KHNAM ka buh ka jingujor kaba jur pyrshah ia kane ka Department ba ka buh tang da ka Personal Interview ban thung briew ia kane ka post hapoh ka Department jong ka. Ka KHNAM ka dawa ba kane ka Department kan pynkylla shi syndion ia ka advertisement da kaba buh da ka ‘Written Test’ ka ban long ka rukom thep kaba thikna, bad lada kane ka department kan kyntait ia kane, yn shim beit ba ka jingthmu jong ka, ka long kaba bakla bad kaba don ka jingshah shiliang. Ka KHNAM ka kyrpad ruh ia u Myntri Rangbah ka jylla u Conrad Sangma ban sngewbha ban khmih lem ia kane ka kam bad ban pynkylla ia kane ka rukom thep kam sha ka Group D, bad C post ha ki Office jong ka State Government ha kaba yn pynduh noh ia ka Personal Interview khnang ba ngin lah ban pynduh ia ka jingbamsap. Kumba ngi tip ba ka sorkar kmie ka la pyntrei kam ia kane naduh u snem 2016 bad na ka jingbha ki samla ka ri ngi dei ban bud ia ka jinglam lynti jong ka.