Ujor ka KHNAM, ba thoh Barapani ia ka Umiam

Shillong, 23 Jylliew:
Ka KHNAM State Youth Wing hapoh ka jingialam u President ka seng U Bah Thomas Passah ka la leit ban ujor sha ka Chief Executive Officer ka Shillong Cantonment Board namar ka jingthoh bakla ia ka kyrteng tynrai ha ki Sign Board ba la buh da ka SCB kum ka jingthoh Barapani ia ka Umiam, Bara Bazar ia ka Iewduh bad kiwei pat, ka la ujor sha ka CEO ba kiba kum kitei ki jingthoh kan pynduh pyndam noh pynban ia ki kyrteng tynrai ba la thoh da ki longshuwa man shuwa.
Ha katei ka jingia kynduh ka CEO jong SCB ka Lalrinpuii Harhsel, IDES ka la ong ba kan sa shah pynkynriah kam noh ha ki khyndiat ki ban wan sha kawei pat ka jylla, hynrei ka la kular ba kan shimkhia ban pynbeit ia kitei ki jingbakla bad ka la ong ba kan phah ia katei ka jingujor sha ki bor ba halor ban leh ia kaba donkam.