Ujor ka KHNAM ba khia ki pla skul

Shillong, 20 Naitung:
Ka KHNAM State Youth Wing ka la dawa na ka sorkar jylla ba kan thaw ia ki lad ki lynti kumno ban pynduna ia ka jingkhia ka pla ki khynnah skul kiba kit kyndung man ka sngi, ka la dawa na u myntri ka tnad pule puthi ban ia syllok bad ki skul bapher bapher kumno ban pynduna ia ka jingkhia ki pla skul ki khynnah.
Ka KHNAM ka la ong ba ka jingkhia ki pla kot ka ktah ia ka koit ka khiah ki khynnah skul, ka la kdew ba sha kiwei ki jylla u wei na ki nongtrei sngewbha u la ujor da ka PIL halor ka jingkhia palat ki pla skul ki khynnah ka Maharashtra, bad ka Mumbai High Court ka la leh ia ka ba donkam, ka sorkar jylla Maharashtra ka la thaw ruh ia ka committee ba kongsan ban peit ia kane ka phang. Ka la ong ba kane ka committee ka la wanrah ia ki 5 tylli ki jinglap bad 44 tylli ki jingai jingmut, bad kat kum kane ka ripod haduh 58 percent ki khynnah skul ba hapoh 10 snem ki don ia ka “Mild Muscle pain” bad haduh 75 percent ki ba hapoh 12 snem ki khynnah ki ioh jingpang na ka por sha ka por na ka daw ka jingkhia ki pla skul.
Ka la ong ba ka tnad ka koit ka khiah ruh ka la maham na ka jingktah ki pla ba khiah ia ki khynnah skul, la don ki ki jingai jingmut ba ki pla skul kim dei ban khia palat ia ka 10 percent na ka jingkhiah jong u/ka khynnah skul, kane ka committee kala ai jingmut ruh ban buh tang 3 sobjek ha ka shi sngi, ar tylli ki period na ka bynta kawei ka sobjek bad bun kiwei kiwei ki jingai jingmut, ki ba ka sorkar jylla jong ka Maharashtra ka la pyntreikam.