Ujor ka JSU War Jaintia, ba sniew tasam ka surok sha Tamabil

Shillong: Ka JSU War Jaintia Circle, ha ka jingialam jong u President samla Eddy Kery Pohtam bad u General Secretary u Kerrydiam Lamin, ki dawa na ka sorkar ban maramot ia ka surok ba don ha Tamabil ka ba long ruh ka jaka ba la mang ban shna ia ka Integrated Check Post – Dawki. Ka seng ka la sngew bynniaw ba kumno ha kiwei ki jaka ha Ri India ba lah mang ban shna ia kine ki ICP – Phase 1 kiba long ki dry port lane ki kad jingia khaii ha ryngkew, katba ia ka Dawki um shym la lah ban pyndep bad la sakhi ruh ba lah pynsangeh treikam ban shna ia ka. Kane ka jingsangeh treikam da ka Land Port Authority of India ban shna ia ka ICP Dawki, ka la pynlong ia kane ka jaka bad surok ban sniew  palat than bad kaba lah shem shitom ban iaid ki kali. Kane ka jingsniew ka surok ka la pynlong ruh ba ki kali kit mar ban khyllem khah khah bad ki nongleit iew leit hat bad ki nongrep ruh ki lah shem jingeh ban poi ha ka por ba biang khamtam kiba na ki shnong ba don ha ki khappud kum ka Nongtalang, Amlympiang, Amdoh, Rhongkum, Amsku, Muktapur, Syndai, Hawai Bhoi bad kiwei kiwei. Ka seng ka la pynpaw ba wat la ka Land Port Authority of India, kam shym lah shimkhia, hynrei ka PWD ka dei ban leh ei ei ia kane khnang ba kane ka surok kan nym julor shuh shuh.

Ha ka juh ka por ka seng bad ka sur u paidpah ki lah pynpaw ha u MLA u Ma Lahkmen Rymbui uba dei ruh u MLA jong ka thain bad ruh uba long u Myntri ka tnat Border Areas ba un shimkhia bad ban pynstet noh ban shna noh ia ka surok khappud (Border Road) ba iaid naduh Tamabil shaduh Muktapur. Ki briew jong kane ka thain kiba im ha ka rep kwai rep tympew ki la pynpaw ba kane ka surok, kaba long ka surok ba kongsan tam, namar ba bun u mar rep ki pynkit lyngba kane ka surok ban pynpoi sha ki iew ki hat. Ki nongrep bad ki nongshongshnong ki la sngew bynniaw ba kumno kane ka surok ba um shim la pynbha ia ka mynta da ki 20 snem kynthih watla bunsien hi ki MLA jong kane ka thain War Jaintia ki ba don ha ka bor namar ba bunsien ki bat ia ka kam Myntri jong ka tnat Border Areas, hynrei kim shym lah shim khia.