Shillong: Ka Hynniewtrep Integrated Territorial Organisation (HITO) lyngba u President Bah Donbok Dkhar, ha ryngkat u Legal Secretary Bah Shaniah S Nongrum mynta ka sngi ka 24 tarik Kyllalyngkot 2024, ka la phah da ka shithi sha ka Superintendent of Police Anti – Infiltration halor ka jingioh jingujor, ba ki don ki briew kiba nabar ka jylla kiba la ioh ban rung laitluid shapoh ka jylla.
Ha ka shithi ba la phah sha ka SP, ka seng HITO ka la pynpaw, ba kum ka seng ka la ioh ia ki jingujor na kiba bun ki paidbah ha kaba iadei bad ka jingiohlad ki briew kiba nabar ka jylla ban rung shapoh ka jylla, katba ki mon khlem kino kino ki jingtalasi.
Kumta ka seng hi dalade ka la leit ban jurip ia kine bad ka la lap ia ka jingshisha halor ka jingdon jong ki briew kiba nabar kiba rung laitluid shapoh ka jylla Meghalaya.
Katkum ki jingtip ba la ioh na uwei u briew ba wan nabar ka jylla, ula ong ba ki briew ba trei hapoh ka Infiltration Check Post ha Byrnihat, ki la shim da ka pisa na kine ki bar jylla, na ka bynta ban ailad ia ki ba kin rung shapoh ka jylla Meghalaya.
Kumta ha kaba iadei bad kane, na ka liang ka seng ka la buh jingkylli, da kaba ong ba hato kam dei ka kam jong ka State Infiltration Branch ban peit bad iada ia ka jingwan rung kyrthep ki bar Ri shapoh ka jylla Meghalaya.
U President ka seng bah Donbok Dkhar u la ong, ba ki pulit ki dei ban pyrkhing bha sha ki border na ka jingwan rung jong ki bar jylla, kumba ki khang ia ki paidbah ba wan iakhih ban dawa ia ka hok. Kumta ka seng HITO ka la kyrpad ia ka SP, ba kan shimkhia ha kaba iadei bad kane ka kam bad ruh ia ka jingleh jong ki nongtrei jong ka Infiltration Check Post kaba don ha Byrnihat.
Phi don ban ong eiei?