Ujor ka HITO ba pynkheiñ kyndon Covid ki seng saiñ hima sima “Na ka 50 ngut, mih pynban da ki spah ha ïalap ilekshon shiteng samoi”

Shillong:Ka Hynñiewtrep Integrated Territorial Organization (HITO) ka phah da ka shithi sha ka Chief Secretary ka jylla ka Kong RV Suchiang ban ujor halor ka jingpynkheiñ kyndon jong ki seng saiñ hima sima ha ka jingïalap ilekshon shiteng samoi hapoh ki 3 tylli ki Konstitwensi.

Ha ka shithi ba la phah ka seng ka la pynpaw ba naduh u ïaïong, 2020, ka jylla Meghalaya ka la shah ktah ha ka khlam COVID-19 bad ba la wanrah ruh ka jingïap ha ki por khangdam napdeng kiwei ki jing pyrkhing bad kyndon ban ïada na ka jingsaphriang u khniang jingpang.

Ka la ong ba ki paidbah ki la im bad ïaid ruh katkum ki jingpyrkhing kyndon ba la buh da ki bor pynïaid distrik bad Sorkar jylla, wat ha ki por tamasa, kiwei ki jingïalang bad kiwei, bad da katei la lah ban tehlakam ïa ka jingsaphriang u khniang jingpang.
“Ha kawei ka bynta, ïa ki ilekshon shiteng samoi ba la dei ban pynlong ha ki 3 Konstitwensi ha jylla, kum ha 13 Maw ryngkneng, 24 Mawphlang bad 47 Rajabala, bad ka long ka bym lah mutdur ba ha ki jingïalap ilekshon, la jur bha ka jingpynkheiñ kyndon Covid 19 da ki seng saiñ hima sima. Ka long kaba kongsan ba kiba thep vote kidei ban deng mask, ban pynjngai bad ki bor pynïaid I kumba ki leh matlah haba don ka jingpynkheiñ kyndon. Na ka bynta kino kino ki jingïalang paidbah la ai jingbit ban don tang 50 ngut ki briew, hynrei na ka bynta ki jingïalap ilekshon shiteng samoi, kam shym la don pud bad da ki spah ngut ki paidbah ki ïalum, khlem mask bad kiwei kiwei,” ong ka shithi ka HITO.
Ka la pynpaw shuh shuh, ba ki briew na baroh ki jylla bad napoh jylla ki dei ban phah test COVID ne ban pyndep baroh ar dose ka COVID vaccine ha shwa ban rung shapoh jylla, hynrei ha ki ilekshon shiteng samoi, la ïohi ba bun na ki paidbah ne nongthep vote kim pat pyndep ai tika ne shah test.

“Ka seng ka buh jingkylli ba hato ki kyndon COVID ba la buh da ka sorkar kidei tang ïa ki riew paidbah bad kim treikam ha ka por ilekshon shiteng samoi?. Kumta ka seng ka kyrpad ba phin shim kam ha kaba ïadei bad ka jingpynkheiñ kyndon COVID hapoh ka jylla khamtam ha ki jingïalap ilekshon shiteng samoi hapoh ka 13 Mawryngkneng, 24 Mawphlang bad 47 Rajabala Konstitwensi bad ban ai jingtip ba bniah la ki nongthep vote ki la ai tika ne em ne ki la dei ban phah test ha shwa ban leit thep vote bad ban pynthikna ba kin bud pyrkhing ïa ki kyndon COVID,” pynkut ka shithi ba la soi da u Bah Shri Lawyerson War, Legacy Secretary bad u Bah Shaniah S Nongrum, Assistant Secretary.