Ujor ka HANM, ba don ki riew shim kabu ha ophis DTO Nongpoh

Nongpoh:Ki nongialam ka HANM, Ri Bhoi District, kaba la ialam da u Bah Ajit Makri, President ka HANM ha Ri Bhoi, mynhynnin ka sngi, ki la leit ujor sha u District Transport Officer (DTO) ka Nongpoh, kaba long kum ka jingpyntip sha u halor ka jingdon ki katto katne ngut ki briew, kiba la shim kabu palat na ki riew paidbah ha ka por ba ki thmu ban leh License thymmai bad kumjuh ruh ia kiwei ki kot kali.

Ka nongrim kaba la pynlong ia kitei ki nongialam ka HANM, ban ujor syndon sha u DTO, ka dei hadien ba ki la ioh ia shibun ki jingujor na ki paidbah paidbah, kiba la pynpaw hakhmat ka seng, ba ki don ki briew kiba don hapoh katei ka ophis, kiba la shim kabu eh ban pynioh ia ka License, ha kaba ki riew paidbah, ki hap ban siew haduh T. 5000 ne T. 6000 na ka bynta ban ioh ia ki License niah kali.

Haba iadei bad katei ka jingshim kabu da kitei ki briew kiba don ha katei ka ophis DTO, na ka liang ka seng, ka la kyntu ia u DTO ba u dei ban leh eiei, khnang ba ki riew paidbah kin lait na kaba shah shim kabu.